Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 163 Hüküm no: 79 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe bt. Hasan Ağa’nın amca oğlu olduğunu ispat eden Aydın b. Durak’ın, hissesine düşen terekeyi varislerden talep ettiği Mahrûse-i Galata a‘mâlinden kasaba-i Tophâneˈde Fındıklıˈda merhûm Molla Çelebimahallesi sükkânından râfi‘-i hâzeˈl-kitâb Aydın b. Durak meclis-i şer‘-i hatîrde bundan akdem mahalle-i mezbûre sâkinelerinden iken vefât eden Âişe bt. Hasan Ağaˈnın zevc-i metrûku olup biˈl-verâse muhallefâtına vâzi‘uˈl-yed olan Mustafa Ağa b. Hüseyin mahzarında üzerine da‘vâ ve takrîr-i kelâm edip mezbûre Âişe vefât edip ve verâseti zevc-i mezbûre Mustafa Ağaˈya ve vâlidesi Fatma nâm hatun ve sadriye sagīre kızı Fatma ile ben li-ebeveyn ammisi oğlu olmağla muhallefâtının on iki sehimden bir sehmi bana â’id olmuş iken mezbûr Mustafa Ağa mâni‘ olur suâl olunup ihkāk-ı hak olunmak taleb ederim dedikde gıbbeˈs-suâl mezbûr Mustafa muhallefât-ı müteveffât-ı mezbûre vaz‘-ı yedini ikrâr verâsetini inkâr edicek müdde‘î-i mezbûrdan da‘vâsına beyyine taleb olundukda udûl-ı Müslimînˈden ve sikāt-ı muvahhidînden olup vilâyet-i Rum Avlonya sancağında vâki‘ Piremadi kazâsına tâbi‘ Fıraş nâm karye ahâlîsinden Mustafa Efendi b. Hasan ve Mehmed Efendi b. Ali nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müdde‘î-i mezbûr Aydın müteveffiye-i mezkûre Âişe Hatunˈun li-ebeveyn ammisi oğlu ve vârisidir minvâl-i vech üzre mezbûre Âişeˈnin babası mezkûr Hasan Ağa ile müdde‘î-i mezbûr Aydınˈın babası Durak li-ebeveyn karındaşlar olup babaları ismi Murad ve dedeleri ismi Abdullah ve maskat-ı re’sleri karye-i mezbûre mahallâtından İskender mahallesi demekle ma‘rûf mahalle ve binâen alâ-zâlik müdde‘î-i mezbûr Aydın müteveffiye-i merkūme Âişeˈnin min-cihetiˈl-usûbetiˈn-nesebiye vârisidir biz bu husûsa bu vech üzre şâhidiz şehâdet dahi ederiz deyü her biri edâ-i şehâdet eylediklerinde gıbbeˈt-ta‘dîl veˈt-tezkiye şehâdetleri makbûle olmağın mûcebiyle ba‘deˈl-hükm mâ vaka‘a biˈt-taleb ketb olundu. Fî-evâil-i şehr-i Muharremiˈl-harâm li-sene erba‘a ve semânîn ve elf. Şuhûdüˈl-hâl: el-Hâc Mustafa b. Hasan Ağa, Yakub b. Ahmed, Sunullah b. Hamza, Rasûl Efendi el-imâm, İsa Bey b. Halil, Hüseyin b. Ali, Ahmed Beşe