Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 746 Hüküm no: 967 Orijinal metin no: [115a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agop v. Marat’ın çuka bahasından alacağını kefilden tahsile Ramazan Ağa b. Hüseyin’i vekil tayin ettiği Bâzirgân tâifesinden bâ‘isü’s-sifr Agop v. Marat nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Sisile cemâ‘atinden Kamal v. Yasef nâm Yahudi mahzarında tav‘an ikrâr ve takrîr-i kelâm edip Aragon cemâ‘atinden Mosi v. Hayder nâm Yahudi zimmetinde beynimizde ma‘lûm Londrine çuka bahâsından hakkım olan bin beş yüz yetmiş beş esedî guruşa bundan akdem mezbûr Kamal emr [ve] kabûlü hâviye kefâlet ile kefîl olduğundan sonra meblağ-ı mezbûrun beş yüz esedî guruşunu merkūm Mosi’den alıp bâkī bin yetmiş beş esedî guruşunu târih-i kitâb senesi Ramazânı’nın on dokuzuncu gününden yüz seksen gün tamâmına değin te’cîl ettiğimden sonra ecel-i mezbûr hulûlünde meblağ-ı bâkī-i mezbûr bin yetmiş beş esedî guruşu kefâletine binâen mezbûr Kamal’dan ahz u kabza dâyinim hâzır bi’l-meclis Ramazan Ağa b. Hüseyin’i vekîl etmişidim, suâl olunup takrîrleri tahrîr olunmak matlûbumdur dedikde gıbbe’s-suâl mezbûr Kamal vech-i muharrer üzre meblağ-ı mezbûra kefîl olduğunu ve mezbûr Ramazan Ağa vekâlet-i mezbûreyi kabûlünü ikrâr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: Mehmed Beşe b. ( ) Çukadâr, Ali Efendi el-İmâm, Murad Beşe b. Abdullah, Veli Bey b. Hüseyin, Mehmed Çelebi b. Abdi, Ebûbekir b. Abdi, Hasan Çelebi b. Ahmed, Mehmed b. Mehmed.