Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 349 Hüküm no: 230 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey’in, ölmeden önce terekesinden techiz, tekfin, hayır, hasenat ve diğer masraflarına harcanması için İbrahim Ağa’yı vasî tayin eylediği Mahmiye-i Galataˈya tâbi‘ kasaba-i Fındıklıˈda Molla Çelebi mahallesi sükkânından işbu bâ‘isüˈr-rakīm mefharüˈl-emâcid veˈl-a‘yân İbrahim Ağa b. el-merhûm el-Hâc Bâlî Ağaˈdan vech-i âtî üzere istişhâd-ı şer‘î sudûrundan sonra mahalle-i mezbûre sâkinlerinden Hasan Efendi b. Ali ve Mustafa Çelebi b. el-Hâc İbrahim nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ mûmâ-ileyh İbrahim Ağaˈnın etbâ‘ından mahalle-i merkūmede sâkine iken bundan akdem vefât eden diğer İbrahim Bey vefât etmeden mukaddem hâl-i marazında vasiyet eyleyip ben bi-emrillâhi te‘âlâ bu dâr-ı fenâdan saray-ı bekāya irtihâl ettiğimde sülüs mâlım mûmâ-ileyh İbrahim Ağa yediyle ihrâc olunup vefâtım gününde mal-ı mezbûrdan üç bin beş yüz akçe techîz ve tekfînime vesâir mesâriflerime ve bin bir akçe ıskāt-ı salâtıma ve bin beş yüz akçe resm-i kısmet vesâir mesârife ve bin, üçüncü ve yedinci günlerime ve bin akçe kırkıncı günümde ve iki bin beş yüz akçe tamam-ı senede mu‘tâd üzre tabh-ı ta‘am olunup fukarâ it‘âm oluna ve dahi mûmâ-ileyh nice re’y ederse eyle eylene deyip vesâyâ-yı mezkûreyi tenfîze mûmâ-ileyh İbrahim Ağaˈyı bizim huzûrumuzda vasî-i muhtâr nasb ve ihtiyâr ve ta‘yîn eyledikde ol dahi vesâyet-i mezkûreyi kabûl ve hizmet-i lâzımesin edâya ta‘ahhüd eylediğinden sonra musırratan aleyhâ vefât edip sülüs mâlı dahi vâfirdir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i [53b] şerâyitiˈl-kabûl şehâdetleri makbûle olmağın mûcebiyle mâ vaka‘a biˈt-taleb ketb olundu. Fiˈl-yevmiˈl-hâdî-i aşer min-Cumâdelâhire li-sene erba‘a ve semânîn ve elf. Şuhûdüˈl-hâl: Ali Efendi b. Şa‘bân, Mustafa Efendi b. Yahya, Seydi Ağa b. Mustafa, Mehmed Çelebi b. Himmet, Osman Ağa b. Şa‘bân