Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 364 Hüküm no: 243 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe b. Abdullah’ın ölümünden önce, küçük oğlu Mustafa için Mustafa Ağa b. Mehmed’i vasî tayin ettiği Mahmiye dâhilinde Alaca Mescid mahallesi sükkânından işbu bâ‘isüˈl-vesîka zahrüˈl-eşbâh Mustafa Ağa b. Mehmed meclis-i şer‘-i şerîfde yine mahalle-i mezbûreden olup vilâyet-i Rumeliˈnde Medîne-i Yenişehirˈde ticâret üzere iken vefât eden Ömer Beşe b. Abdullah nâm kimesnenin verâseti zevce-i metrûkesi Gülbahar bt. Abdullah ile sulbî sagīr oğlu Mustafaˈya münhasıra olduğu şer‘an zâhir ve müte‘ayyin oldukdan sonra mezbûre mahzarında üzerine [da‘vâ] ve takrîr-i kelâm edip müteveffâ-yı merkūm Ömer Beşe medîne-i mezbûreye gider oldukda huzûr-ı Müslimînˈde bi-emrillâhi te‘âlâ eğer medîne-i mezbûrede vefât edersem sagīr oğlum mezbûr Mustafaˈya muhallefâtımdan isâbet eden hissesini kabza vasî-i muhtâr olunsun dedikde gıbbeˈs-suâl ve akībeˈl-inkâr merkūmel-Hâc Mustafa Ağaˈdan müdde‘âsına beyyine taleb olundukda udûl-ı Müslimînˈden el-Hâc Ali b. Mehmed ve diğer el-Hâc Ali b. Mehmed nâm kimesneler li-ecliˈş-şehâde meclis-i şer‘a hâzırân olup gıbbeˈl-istişhâdiˈş-şer‘î fiˈl-hakīka müteveffâ-yı mezbûr hayatında medîne-i mezbûrede oldukda bi-emrillâhi te‘âlâ vefât ettiğimde sagīr oğlum merkūma muhallefâtımdan intikāl eden hissesini [56a] kabza vesâir umûruna bizim huzûrumuzda müşârün-ileyhel-Hâc Mustafa Ağaˈyı vasî-i muhtâr nasb ve ta‘yîn edip ol dahi kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈl-işrîn min-Cumâdelâhire li-sene erba‘a ve semânîn ve elf. Şuhûdüˈl-hâl: İbrahim Efendi b. Receb el-imâm, es-Seyyid Bedreddin Çelebi b. es-Seyyid Hasan Efendi, Mehmed Çelebi b. el-Hâc Mustafa, İbrahim Çelebi b. el-Hâc Mehmed, Ali Bey