Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 452 Hüküm no: 301 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan Beşe’nin, merhum Bali Beşe b. Behram’ın şişehane ve şişecilikte ortağı olduğu, ortağının terekesinden intikal eden hisseleri varislerden satın aldığı Medîne-i Hazret-i Eyübˈde Kiremitçi Süleyman mahallesinde sâkin iken bundan akdem vefât eden Bali Beşe b. Behramˈın verâseti zevce-i metrûkesi Canfeda Hatun ile sulbî sagīr oğlu Aliˈye ve mezbûre Canfedaˈnın batnında hamle münhasıra olup kableˈl-kısme mezbûr Ali dahi fevt olup verâseti vâlidesi mezbûre Canfeda ile sulb-ı mezkûra münhasıra olduğu şer‘an zâhir oldukdan sonra mezbûre Canfeda tarafından husûs-ı âtiˈl-beyâna vekîl olup zât-ı mezkûru alâ-ma‘rifet-i şer‘iye ile ârifân olan el-Hâc İbrahim b. Abdullah ve Mustafa Bey b. Murad şehâdetleriyle şer‘an vekâleti sâbite olan es-Seyyid Yusuf Çelebi b. es-Seyyid Halil ile haml-i mezbûre kıbel-i şer‘den vasî nasb olunan Esad Çelebi b. Mesud meclis-i şer‘de müteveffâ-yı mezkûrun şerîki olan işbu bâ‘isüˈl-vesîka Rıdvan Beşe b. Abdullah mahzarında her biri vekâleten ve vesâyeten ikrâr ve takrîr-i kelâm edip müteveffâ-yı mezbûr ile mezbûr Rıdvan Beşe şişecilik san‘atında zarar ve fâide beyinlerinde beraber olmak üzere şerîkler olup kable fesh-i akdiˈş-şirke mezbûr Bali Beşe vefât edip merkūm Rıdvan Beşe ile taht-ı icârelerinde olan medîne-i merkūme sûkunda vâki‘ şişehâne içinde mevcûd zeyl-i vesîkada isimleri muharrer olan bî-garaz Müslimîn tahmîn ve takvîm ile takvîm olunan hatab ve natruna ve envâ‘-ı şişe ve âlât-ı lâzıme bahâları ile zimem-i nâsda olup şişe bahâsı olan mal-ı şirket ki cem‘an dört yüz dokuz bin üç yüz üç akçenin nısfı olan iki yük dört bin altı yüz elli bir akçesi ber-mûceb-i defter-i kassâm-ı askerî müteveffâ-yı mezbûrun hakk-ı sırfı olduğu ledeˈş-şer‘ müte‘ayyin oldukdan sonra meblağ-ı mezbûrun yirmi bin altı yüz kırk iki akçesi zimem-i nâss-ı mezbûr ve yüz seksen dört bin dokuz yüz akçesine hatab ve natrun ve envâ‘-ı şişe ve âlât-ı lâzıme ta‘yîn olunup lâkin mürûr-ı eyyâmile mârrüˈz-zikr hatab ve natrun ve envâ‘-ı şişe ve âlât-ı mezbûreye vasîde kaldıkda menzil-i mevrûsun misilleriyle beyʻ ve semenleri i‘mâl olunmak haml-i mezkûre evvel olmağın her birimiz vekâleten ve vesâyeten müteveffâ-yı mezbûrun nısf hissesi olan hatab ve natrun ve envâ‘-ı şişe ve âlât-ı mezbûreyi Müslimîn-i merkūmîn takvîm üzre yüz seksen dört bin dokuz yüz akçeye nesîeten? bey‘ ve teslîm ol dahi ba‘deˈl-iştirâ veˈt-tesellüm semen-i merkūmu târih-i kitâbdan beş yüz kırk gün tamamına değin tecîl eylediğimizde merkūm Rıdvan Beşe dahi vech-i muharrer üzere kabûl ve ecl-i mezkûr tamamında zimem-i mezbûr yirmi bin altı yüz kırk iki akçe ile semen-i mezbûr yüz seksen dört bin dokuz akçeyi edâya müte‘ahhid olmağla eşyâ-i mezbûre müşteri hakkıdır dediklerinde gıbbeˈt-tasdîk mâ vaka‘a biˈt-taleb ketb olundu. Fiˈl-hâmis-i aşer min-Receb sene [10]84. Şuhûdüˈl-hâl: es-Sâbıkūn