Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 454 Hüküm no: 303 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Behram’ın, merhum Bali Beşe b. Behram’daki alacağını varislerden talep ettiği İşbu bâ‘isetüˈr-rakīm Âişe bt. Behram meclis-i şer‘de Medîne-i Hazret-i Eyübˈde Kiremitçi Süleyman mahallesinde sâkin iken bundan akdem vefât eden Bali Beşe b. Behramˈın verâseti zevce-i metrûkesi Canfeda bt. Abdullah sagīr oğlu Aliˈye ve merkūme Canfedaˈnın batnında hâsıl hamle münhasıra olduğu şer‘an zâhir oldukdan sonra mezbûre Canfeda tarafından husûs-ı âtiˈl-beyâna vekîl olup mezbûrenin zâtını ma‘rifet-i şer‘iye ile ârifân olan Mustafa Bey b. Murad ve el-Hâc İbrahim b. Abdullah şehâdetleriyle şer‘an vekâleti sâbite olan es-Seyyid Yusuf Çelebi b. es-Seyyid Halil ile sagīr-i mezbûrun ve haml-i mezkûrun kıbel-i şer‘den mansûb vasîleri olan Rıdvan Beşe b. Abdullah mahzarlarında üzerlerine da‘vâ ve takrîr-i kelâm edip müteveffâ-yı mezbûr ile benim li-üm karındaşım olur merkūm Bali Beşeˈden mukaddem fevt olan Hasan Beşe nâm kimesnenin muhallefâtından benim kırk esedî hisse-i şer‘iyemi mezbûr Bali Beşe kabz edip bana edâ etmezden mukaddem vefât edip hâl-i hayatında meblağ-ı mezbûr bana deyni olduğunu huzûr-ı Müslimînˈde ikrâr ve işhâd dahi etmekle hâlâ mezbûre Canfeda ile vasî-i mezbûrun vâzi‘uˈl-yed oldukları terekeden taleb ederim suâl olunsun dedikde gıbbeˈs-suâl veˈl-inkâr müdde‘iyye-i mezbûreden müdde‘âsına beyyine taleb olundukda udûl-ı Müslimînˈden Mehmed Çelebi b. Hasan ve Mustafa Bey b. Murad ve li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr Bali Beşe hayatında mezbûr Âişeˈnin ve benim li-üm karındaşımız olup mukaddemâ fevt olan Hüseyin Beşe nâm kimesnenin muhallefâtından kırk esedî hissesini kabz eyledim hâlâ mezbûre Âişeˈye meblağ-ı mezbûr zimmetimde deynimdir huzûrumuzda ikrâr ve bizi işhâd eyledi bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâyitiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle hüküm birle mâ vaka‘a. Fiˈt-târihiˈl-mezbûr. Şuhûdüˈl-hâl: es-Sâbıkūn