Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 536 Hüküm no: 354 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Nesli Hatun bt. Sefer’den çocuklara intikal eden ev hisselerinin, vekil tarafından babaları Mehmed Reis’e satıldığı Mahmiye-i Galataˈya tâbi‘ kasaba-i Kasımpaşa mahallâtından Kalafatcıbaşı mahallesinde sâkine iken bundan akdem müteveffât olan Nesli Hatun bt. Seferˈin verâseti zevc-i metrûku Mehmed Reis ile li-ebeveyn karındaşları Receb ve Emin nâm kimesnelere münhasıra olduğu şer‘an zâhir ve mütebeyyin oldukdan sonra mezbûre Emine tarafından menzil-i âtiˈz-zikri bey‘a ve kabz-ı semene vekîli olup vekâleti mezbûrenin zâtı ma‘rifet-i şer‘iye ile ârifân olan Mehmed b. Mustafa ve Hüseyin b. Hüseyin nâm kimesneler şehâdetleri ile vekâleti sâbite olan merkūm Receb meclis-i şer‘-i hatîr-i lâzımüˈt-tevkīrde işbu bâ‘isüˈl-kitâb Mehmed Reis mahzarında asâleten ve vekâleten ikrâr ve takrîr-i kelâm edip mûrisimiz müteveffât-ı mezbûrenin mahalle-i mezbûrûnda vâki‘ bir tarafı makābir-i Müslimîn ve iki tarafı Osman Reis mülküne ve bir tarafı tarîk-i hâs ile mahdûd bir bâb tahtânî ve bir bâb fevkānî odalar ve kilârı ve merkūm Osman Reis ile müşterek bi’r-i mâ’î müştemil menzilde altı sehimden iki sehm hisse-i şâyi‘amızı asâleten ve vekâleten merkūm Mehmed Reisˈe altı bin akçeye bey‘-ı kat‘î ile bey‘ edip ol dahi iştirâ ve kabûl eyleyip semen olan meblağ-ı mezbûr altı bin akçeyi merkūm Mehmed yedinden asâleten ve vekâleten ahz u kabz eyledim ba‘deˈl-yevm menzil-i mezbûrda olan sülüs hisse-i şâyi‘amız mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Hurrire fiˈl-yevmiˈl-hâmis-i aşer min-Şevvaliˈl-mükerrem sene erba‘a ve semânîn ve elf. Şuhûdüˈl-hâl: Mustafa Efendi b. Hamza, Mustafa Efendi b. Mehmed el-imâm, es-Seyyid Mehmed b. es-Seyyid Ahmed, es-Seyyid Mehmed b. es-Seyyid Mehmed, Mustafa b. Hasan el-imâm, Mehmed b. Ali el-hayyât, Musa Hoca b. İlyas, Hüseyin b. Mehmed Beşe(... ?)