Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 585 Hüküm no: 401 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, Fatma bt. Hüseyin’in küçük oğlu Mustafa’ya vasî tayin olduğu Mahmiye-i Galataˈya tâbi‘ kasaba-i Tophâne mahallâtından Hoca Ali mahallesinde sâkin Ahmed Beşe eş-şehîr Babekî [nâm] kimesneden vech-i âtî üzere da‘vâ-yı sahîh-i şer‘iye ile mesbûk istişhâd-ı şer‘î sudûrundan sonra udûl-ı Müslimînˈden olup kasaba-i mezbûre mahallâtından Mustafa Ağa mahallesi sükkânından el-Hâc Durmuş ve el-Hâc Piyale b. Abdullah nâm kimesneler li-ecliˈş-şehâde meclis-i şer‘a hâzırân olup hâlâ kasaba-i mezbûre mahallâtından İlyas Çelebi mahallesinde sâkine iken müteveffât olan Fatma [bt.] el-Hâc Hüseyin nâm hatun hâl-i marazında müsteşhed-i mezbûr Mehmedˈi sagīr oğlu Mustafaˈya bizim huzûrumuzda vasî-i muhtâr nasb ve ta‘yîn edip musırratan vefât eyledi biz bu husûsa şâhidleriz şehâdet dahi ederiz dediklerinde ba‘de ri‘âyet-i şerâˈitiˈl-kabûl şehâdetleri makbûle olmağla mâ vaka‘a biˈt-taleb ketb olundu. Fiˈl-yevmiˈl-hâmis-i aşer min-Zilka‘detiˈş-şerîfe li-sene erba‘a ve semânîn ve elf. Şuhûdüˈl-hâl: Abdülbaki Çelebi b. Musa el-müezzin, Ahmed Efendi b. Yusuf el-imâm, el-Hâc Mustafa b. İbrahim, el-Hâc Mehmed b. İbrahim, el-Hâc Mustafa b. Miyan, Mustafa b. Arabzâde, Mehmed b. Mustafa el-müezzin