.:: İstanbul Kadı Sicilleri ::.


Galata Mahkemesi 114 Numaralı Sicil (H. 1083-1085 / M. 1672-1674)
cilt: 54, sayfa: 599
Hüküm no: 410
Orijinal metin no: [98b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ali Çavuş’un, Mehmed Bey b. Yusuf’tan kendisine intikal eden tereke hissesini Mehmed Bey’in karısı Havva’dan teslim aldığı

Mahmiye-i Galata muzâfâtından kasaba-i Tophâneˈde Firuzağa mahallesinden olup sefer-i hümâyûnda vefât eden Mehmed Bey b. Yusufˈun verâseti zevce-i metrûkesi Havva bt. Abdullah anası Hadiceˈnin li-ebeveyn er karındaşı Murad nâm-ı diğer Ali Çavuş b. Abdullahˈa münhasıra olduğu şer‘an zâhir ve müte‘ayyin oldukdan sonra mezbûr Ali Çavuş meclis-i şer‘-i şerîfde müteveffâ-yı mezbûrun terekesine vâzi‘atüˈl-yed olan zevcesi işbu bâ‘isetüˈl-vesîka mezbûre Havva mahzarında ikrâr ve takrîr-i kelâm müteveffâ-yı mezbûrun terekesinin rub‘ı zevcesi mezbûreye ve selâse-i erbâ‘ı bana intikāl ve isâbet etmekle hâlâ ber-mûceb-i defter-i kassâm-ı askerî benim selâse-i erba‘ hisseme isâbet eden beş bin yedi yüz kırk dokuz akçeyi mezbûre Havva yedinden biˈt-tamam veˈl-kemâl ahz u kabz eyledim min-ba‘d mûrisim müteveffâ-yı mezbûrun terekesinde hak ve alâkam kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu.

Fiˈl-hâmis min-Zilhiccetiˈş-şerîfe li-sene erba‘a ve semânîn ve elf.

Şuhûdüˈl-hâl: Ömer Efendi b. Ahmed el-imâm, Mehmed Efendi b. Ahmed el-imâm, el-Hâc Mehmed b. el-Hâc Bayram, el-Hâc Mustafa b. Hasan, Sunullah Çelebi b. Mehmed, Osman Çelebi b. Ahmed, Mustafa Çelebi b. Ömer, Ahmed b. Mehmed.