Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 602 Hüküm no: 413 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varisler için, merhum Mehmed Beşe b. Ahmed’ten intikal eden gemi, kayık ve eşyaların vasî tarafından Mahmud Çelebi ve Abdülbaki Çelebi’ye satıldığı Mahmiye-i Galata muzâfâtından kasaba-i Tophâneˈde Cihangir mahallesinde sâkin iken bundan akdem vefât eden Mehmed Beşe b. Ahmedˈin verâseti zevce-i metrûkesi Alem bt. İsmail ile anası Kâtibe bt. Abdullah ve müteveffâ-yı mezbûrun firâşından hâsıl mezbûre Alimeˈnin batnında mevcûd hamle münhasıra olduğu şer‘an zâhir ve müte‘ayyin oldukdan sonra mezbûretân Alime ve Kâtibe taraflarından husûs-ı câ’îye vekîl olup merkūmetânın zâtlarını ma‘rifet-i şer‘iye ile ârifân olan Mehmed Beşe b. Bayram ve Durmuş b. Ali ve Ali Reis b. Durmuş şehâdetleriyle şer‘an vekâleti sâbite olup haml-i mezbûrun dahi kıbel-i şer‘den mansûb vasîsi olmağla tereke-i müteveffâ-yı mezbûre vekâleten ve vesâyeten vâzi‘uˈl-yed olan fahrüˈl-eşbâh Ahmed Ağa b. ( ) meclis-i şer‘-i şerîfde işbu bâ‘isüˈl-vesîka Mahmud Çelebi b. Ali ve Abdülbaki Çelebi b. İbrahim mahzarlarında vekâleten ve vesâyeten ikrâr ve takrîr-i kelâm edip müteveffâ-yı mezbûrun muhallefâtından olup Fındıklı İskelesiˈnde merbût isparçine ta‘bîr olunur bir halat ve iki kara halatı ve yüz küfe ve üç yelken ve iki gemi demiri vesâir âlât-ı mevcûdesi olan bir kebîr kayık ve iki yelken ve iki gemi demiri vesâir âlât-ı mevcûdesi olan dört çifte bir sagīr kayık ve iskele-i mezbûre kurbünde vâki‘ taht-ı icâresinde olan mahzeninde mevcûd on pâre lüfer ve on pâre uskumru kafanası ve bir tobe ta‘bîr olunur ağları ve on iki kebîr fıçı ve içlerinde bin beş yüz tuzlu uskumru balığı [99b]ve beş keyl tuz ve elli üç limorabi ve bir arkalye ve dört kulaç bir altı kulaç bir cem‘an iki kıt‘a hamsi ağrebleri vesâir mahzen-i mezbûrda mevcûd balıkçı âlâtı bey‘ olunması lâzım gelmeğle biˈl-izniˈş-şer‘î Hüseyin Bey el-münâdî yediyle beyneˈt-tâlibîn nidâ ve müzâyede ve ba‘de inkıtâ‘iˈr-rağbe mezbûrân Mahmud Çelebi ve Abdülbaki Çelebi üzerlerinde vech-i muharrer üzre kebîr kayık cümle âlâtıyla seksen esedî bir rub‘a ve sagīr kayık âlâtıyla yirmi beş esedî bir sülüs guruş ve iki kıt‘a hamsi ağrebi ağları elli dokuz esedîye ve yirmi pâre tefanlar?yirmi esedîye ve beş esedî fıçıları ve balık ve elli üç lemor? ve iki meşfel? vesâir hırdavat zât-ı ma‘lûme beş esedîye ki cem‘an yüz doksan esedî ve bir rub‘ ve bir sülüs guruşda karâr ve ziyâde ile tâlib olmadığından mâ‘adâ meblağ-ı merkūm zikrolunan kayıklar ve ağların semen-i misli olduğunu zeyl-i vesîkada isimleri muharrer olan Müslimîn haberleriyle mukarrer oldukdan sonra vekâleten ve vesâyeten meblağ-ı mezbûre sâlifüˈz-zikr kayıklar ve ağları mezkûrâna bâtten bey‘ ve teslîm anlar dahi ba‘deˈl-iştirâ veˈt-tesellüm meblağ-ı mezbûr yüz doksan esedî ve bir rub‘ ve bir sülüs guruşu mezbûrân yedlerinden biˈt-tamam ahz u kabz eyledim min-ba‘d mülk-i müşterâsıdır hasbe mâ yeşâ’ mutasarrıf olsunlar dedikde gıbbeˈt-tasdîk mâ vaka‘a biˈt-taleb ketb olundu. Fiˈl-hâmis min-Zilhiccetiˈş-şerîfe li-sene erba‘a ve semânîn ve elf. Şuhûdüˈl-hâl: Ramazan Çelebi b. Hüseyin, Ali Çelebi b. Mehmed, Murad Çelebi b. Mustafa, Hasan Hoca b. Mustafa Ustarcıbaşı, Receb Reis b. Mehmed, Cafer Beşe b. Abdullah, Kara Ali b. Durmuş, Mustafa Çelebi b. Firuz, İbrahim b. Mehmed, Hüseyin Beşe b. Mehmed