Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 613 Hüküm no: 424 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Süleyman Beşe’nin büyük oğlu Hasan Beşe’nin, terekeden intikal eden eşya satışından para saklamadığına yemin ettiği Mahmiye-i Galata a‘mâlinden kasaba-i Tophâneˈde Sakabaşı mahallesinde sâkin iken bundan akdem vefât eden Süleyman Beşe b. Hasanˈın verâseti zevcât-ı metrûkâtı Zarife bt. Osman ve Fatma bt. Mustafa ve Âişe bt. Abdullah nâm hatunlar ile kebîr oğlu Hasan Beşe ve sagīr oğlu Mehmed ve merkūme Âişe batnında mevcûd hamle münhasıra olup ba‘dehû sagīr-i mezbûr Mehmed dahi vefât edip verâseti vâlidesi mezbûre Fatmaˈya ve li-eb er karındaşı mezbûr Hüseyin Beşeˈye ve haml-i mezkûre münhasıra olduğu şer‘an zâhir ve müte‘ayyin oldukdan sonra merkūme Fatma meclis-i şer‘de işbu bâ‘isüˈl-vesîka mezbûre Hasan Beşe mahzarında üzerine da‘vâ ve takrîr-i kelâm edip müteveffâ-yı mezbûr Süleymanˈın ba‘zı eşyâlarını mezbûre Hasan Beşe âhara bey‘ eyledikde semenlerinden on guruş ketm etmekle cem‘an otuz esedî guruş ile ba‘zı muhallefât-ı ma‘lûme ve menkūlesini ketm ve ihfâ etmeğin hâlâ hisse-i şer‘de mezbûr Hasan Beşeˈden taleb ederim suâl olundukda gıbbeˈs-suâl veˈl-inkâr ve isre-talebiˈl-beyyine ityân-ı beyyineden izhâr-ı acz ve istihlâf etmeğin fiˈl-hakīka müteveffâ-yı mezbûrun meblağ-ı mezbûr otuz esedî guruş ile ma‘lûme ve menkūlesini ketm ve ihfâ etmediğine mezbûr Hasan Beşeˈye yemîn teklîf olundukda ol dahi hasebüˈl-mesûl yemîn-i billâhiˈl-aliyyüˈl-a‘lâ edicek mûcebiyle bilâ-beyyine bi-vech ta‘arruzdan merkūme Fatma men‘ olunup mâ vaka‘-a biˈt-taleb ketb olundu. Fiˈs-sâlis veˈl-işrîn min-Zilhiccetiˈş-şerîfe li-sene erba‘a ve semânîn ve elf. Şuhûdüˈl-hâl: Mehmed Efendi el-imâm, İsmail Efendi b. Mehmed, Mustafa Beşe b. el-hayyât, Ahmed Beşe b. Osman, Hüseyin Çelebi b. Ali