Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 664 Hüküm no: 467 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Efendi’nin, merhum Bayram Kethuda’nın küçük kızına vasî kayyım tayin edildiği Galatasarayıˈnda sâbıkā baltacılar kethudâsı iken düyûnu terekesinden ezyed olduğu hâlde vefât eden Bayram Kethudâ b. Baliˈnin sagīre kızı Âişeˈnin tesviye-i emrine ve tereke-i mezkûreye kıbel-i şer‘den mansûb bir vasî ve kayyımdan lâ-büd olmağla istikāmet ile ma‘rûf işbu hâmilüˈr-rakīm zahrüˈl-ulemâ Şa‘bân Efendi b. Hüseyin her vecihle evlâ ve enfa‘ olmağın hâkim-i muvakki‘-i sadr-ı kitâb ve tûbâ-lehû ve hüsnü-meâb hazretleri vech-i meşrûh üzre mezbûr Şa‘bân Efendi sagīre-i mezbûrenin tesviye-i emrine ve tereke-i müteveffâ-yı mezbûra savb-ı şer‘den vasî kayyım nasb ve ta‘yîn ettikde ol dahi kabûl ve hizmet-i lâzımesin edâya ta‘ahhüd etmeğin mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene hamse ve semânîn ve elf. Şuhûdüˈl-hâl: İsmail Bey b. Ahmed el-bevvâbüˈs-sultânî, Mehmed Bey b. Ahmed el-bevvâbüˈs-sultânî, Mehmed Bey Ser-bölük, Mustafa Çelebi b. Yusuf, Hüseyin Çelebi b. Ali, Ahmed Efendi b. Hüseyin, Mehmed Efendi b. Ali, Abdullah b. Receb, Ali Bey b. Halil, Ahmed b. Osman, Mehmed b. Ahmed ve gayruhum min.