Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 717 Hüküm no: 522 Orijinal metin no: [121b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe’nin, kocası merhum Laz Ali’nin çocuklarına vasî olduğu, terekeden Beşir Ağa zimmetinde olduğunu iddia ettiği alacağı ispat edemediği Mahmiye-i Galataˈya tâbi‘ kasaba-i Tophâneˈde Cihangir mahallesinde sâkin iken bundan akdem vefât eden Laz Ali nâm kimesnenin verâseti zevceteyn-i metrûketeyn Âişe bt. Abdullah ve Havva bt. Abdullah nâm hatunlar ile sulbî sagīr oğulları Hasan ve İbrahim ve Ahmedˈe münhasıra olduğu şer‘an zâhir ve müte‘ayyin oldukdan sonra sagīrân-ı mezbûrân Hasan ve Ahmedˈin anaları mezbûre Havva meclis-i şer‘-i şerîfde vasî-i muhtârları olup tereke-i müteveffâ-yı mezbûra vâzi‘uˈl-yed olan el-Hâc Beşir Ağa b. Mehmed mahzarında üzerine da‘vâ ve takrîr-i kelâm edip mezbûr el-Hâc Beşir Ağa müteveffâ-yı mezbûrun terekesinden düyûnunu edâ ve teslîm ettikden sonra bâkī yedinde benim ve sagīrân-ı mezbûrânın ve merkūman Âişeˈnin hakları olmak üzere yüz elli guruş kalmışdır hâlâ taleb ederim suâl olunsun dedikde gıbbeˈs-suâl veˈl-inkâr ityân-ı beyyineden izhâr-ı acz ve istihlâf etmeğin fiˈl-hakīka müteveffâ-yı mezbûrun meblağ-ı mezbûr ile tereke-i müteveffâ-yı merkūmdan bir şey kalmadığına yemîn teklîf olundukda ol dahi hasebüˈl-mesûl yemîn-i billâhiˈl-aliyyüˈl-a‘lâ edicek mûcebiyle bilâ-beyyine bî-vech-i ta‘arruzdan merkūme Havva men‘ olunup mâ vaka‘a biˈt-taleb ketb olundu. Fiˈl-hâmis-i aşer min-şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: Zahrüˈl-kuzât Musa Efendi el-kâdî, Hasan Çelebi b. İshak, Ömer Efendi b. Ali, Mehmed b. Ahmed, Hüseyin Çelebi b. Ali, Ali Bey