Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 729 Hüküm no: 534 Orijinal metin no: [124a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî Ayşe Hatun’a, küçük oğlu ve oğlunun hademesi için harcama yapmasına izin verildiği Mahmiye-i Galata tevâbi‘inden kasaba-i Kasımpaşaˈda Yeldeğirmeni mahallesinde sâkine işbu sahibetüˈl-vesîka Âişe Hatun bt. Mehmed meclis-i şer‘-i şerîfde takrîr-i kelâm edip zevcim olup bundan akdem vefât eden el-Hâc Hasan Çavuş b. Hamzaˈnın firâşından hâsıl benden mütevellid sadrî oğlum Hamza Çelebi nâm sagīre babasından intikāl eden mal-ı mevrûsundan kendinin ve bir hademesinin nafaka ve kisve-bahâsı içün kıbel-i şerî‘at-i mergūbeden ba‘deˈl-karz veˈt-takdîr vakt-i zarûretde istidâne ve hîn-i zaferde rücû‘a bana izin verilmesi matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü-meâb hazretleri minvâl-i muharrer üzere sagīr-i mezbûrun kendiye ve bir hademesine mal-ı mevrûsundan târih-i kitâbdan küllî yevm otuz akçe nafaka ve kisve-bahâ farz ve takdîr edip sagīr-i mezbûr ile hademesinin havâyicine sarfa ve vakt-i zarûretde istidâne ve hîn-i zaferde rücû‘a merkūme Âişeˈye izin birle mâ vaka‘a biˈt-taleb ketb olundu. Fî-gurreti şehri Rebî‘iˈl-evvel li-sene hamse ve semânîn ve elf. Şuhûdüˈl-hâl: el-Hâc Abdurrahman b. Hasan, Mehmed Çavuş b. Davud, eş-Şeyh Mehmed Efendi b. Hüseyin, Mehmed Çelebi b. İbrahim, İbrahim Çelebi b. Ali, Ahmed Çavuş b. Mehmed, İsa Bey, Hüseyin b. Ali Bey, Ahmed Beşe b. Osman.