Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 772 Hüküm no: 1005 Orijinal metin no: [119b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Receb’in es-Seyyid Mustafa Çelebi’den boşanıp hakkını tahsil ettiği Mahrûse-i Galata müzâfâtından Fındıklı kasabasında Selime Hâtun mahallesinde sâkine Sâliha bt. Receb nâm hâtun meclis-i şer‘-i hatîr-i lâzımü’t-tevkīrde zevci bâ‘isü’l-kitâb es-Seyyid Mustafa Çelebi b. Şaban nâm kimesne mahzarında ikrâr ve takrîr-i kelâm edip mezbûr es-Seyyid Mustafa Çelebi işbu târih-i kitâb günü beni talâk-ı bâyin ile tatlîk eyleyip zimmetinde mütekarrir ve ma‘kūdun aleyh olan iki bin iki yüz akçe mehr-i müeccelim ve nafaka-i iddetim için târih-i kitâb gününden yevmî beşer akçe ve mezbûrdan olan sagīre kızım Fâtıma’nın nafakası için takdîr olunan yevmî üçer akçeden birer aylık olmak üzre ber vech-i peşîn cem‘an iki yüz kırk akçeyi mezbûr es-Seyyid Mustafa Çelebi yedinden ahz u kabz edip zevciyyete müte‘allika da‘vâdan her birimiz âharın zimmetini ibrâ ve iskāt eyledik mezbûr es-Seyyid Mustafa Çelebi dahi mukırre-i mezbûreyi vech-i muharrer üzre bâyinen tatlîk eylediğini ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Seyyid Hasan Çavuş el-Mübâşir, es-Seyyid Süleyman Çelebi b. es-Seyyid Ali, Mehmed b. Abdullah, Dilâver b. Abdullah, Baba Resul [b.] Rıdvan.