Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 825 Hüküm no: 618 Orijinal metin no: [140a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın, kocası merhum Yusuf Beşe’nin zimmetindeki mehir alacağını vasîden talep ettiği Mahmiye-i Galataˈya tâbi‘ kasaba-i Kasımpaşaˈda Yeldeğirmeni mahallesinde sâkin iken bundan akdem vefât eden el-Hâc Yusuf Beşe b. Abdullahˈın verâseti zevce-i metrûkesi Safiye bt. Abdullah ile sulbî kebîr oğlu Mustafa Çelebi ve sagīr oğulları Halil ve Abdullahˈa münhasıra olduğu zâhir ve müte‘ayyin oldukdan sonra meclis-i şer‘-i enverde mezbûre Safiyeˈnin vekîl-i müsecceli olan Mehmed Çelebi b. Hüseyin biˈl-vekâle mezbûr Mustafa mahzarında üzerine da‘vâ ve takrîr-i kelâm edip müvekkilem mezbûre Safiyeˈnin zevci müteveffâ-yı mezbûrun zimmetinde ma‘kūdun-aleyh olan yirmi bin akçe hakkını kableˈl-istifâ fevt olup hâl-i hayatında meblağ-ı mezbûr bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ mezbûr Mustafaˈdan taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Receb b. ( ) ve Şa‘bân b. Abdullah nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında zevcem işbu Safiye bt. Abdullah nâm hatunun yirmi bin akçe mehr-i müecceli zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra mezbûre Safiye Hatun muhadderâtdan olup meclis-i şer‘a huzûru müte‘azzire olmağın tahlîfine kıbel-i şer‘den Mevlânâ Ömer Efendi irsâl olunup ol dahi mezbûre Safiyeˈnin menziline varıp aleˈl-vechiˈl-meşrû‘ tahlîf içün ettiği mahâllinde tahrîr ve ba‘dehû ma‘an irsâl olunan Ahmed Beşe b. Osman, Veli Çelebi b. Ali meclis-i şer‘a gelip alâ-vukû‘ihî inhâ ve takrîr etmeğin mûcebiyle ba‘deˈl-hükm mâ vaka‘a biˈt-taleb ketb olundu. Fî-gurreti Cumâdelâhire li-sene hamse ve semânîn ve elf. Şuhûdüˈl-hâl: Fahrüˈl-müderrisînüˈl-kirâm Hasan Efendi b. İshak, Mustafa b. Hızır, Veli Çelebi b. Veli, Hüseyin Çelebi b. Ali, Ali Beşe b. Halil, Hacı Efendi