Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 873 Hüküm no: 661 Orijinal metin no: [148b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. Hamza Bey’den varislere intikal eden evin satışa çıkarıldığı Mahmiye-i Galataˈya tabi‘ kasaba-i Tophâneˈde Firuzağa mahallesinde sâkin iken bundan akdem vefât eden el-Hâc Abdi b. Hamza Bey verâseti zevce-i metrûkesi Ümmühani bt. İbrahim nâm hatun ile sulbî kebîr oğlu Hasanˈa kezâlik sagīr oğlu Kadriˈye kezâlik sagīre kızı Râbiaˈya münhasıra olup kableˈl-kısme sagīre-i mezbûre Râbia dahi müteveffât olup verâseti vâlidesi mezbûre Ümmühani Hatunˈa ve li-ebeveyn er karındaşları mezbûrân Hasan ve Kadriˈye münhasıra olup kableˈl-kısme mezbûr Kadri dahi fevt olup verâseti vâlidesi mezbûre Ümmühani ile li-ebeveyn karındaşı mezbûr Hasanˈa ve li-üm karındaşı Mehmed b. Yakubˈa münhasıra olup kableˈl-kısme merkūm Hasan dahi fevt olup verâseti vâlidesi mezbûre Ümmühani ile zevce-i metrûkesi diğer Ümmühani bt. Mehmedˈe ve li-eb karındaşı mezbûre Mehmedˈe münhasıra olduğu şer‘an zâhir ve müte‘ayyin olup müteveffât-ı evvel mezbûr el-Hâc Abdi b. Himmetˈin emlâkinden müntakil mahalle-i mezbûrede vâki‘ bir tarafı Arakıyeci Ramazan mülkü ve bir tarafı Ahmed Ağa veresesi mülkü ve tarafeyni tarîk-i hazır ile mahdûd bir bâb tahtânî ve fevkānî odalar ve zokak kapısı ve bir odunluk mahzeni ve kezâlik bir bâb tahtânî oda ve fevkānî oda ve dehliz ve bi’r-i mâ’î ve kenîfi ve eşcâr-ı müsmire ve gayr-ı müsmire bağçeyi müştemil menzil minvâl-i meşrûh üzere bi-tarîkıˈl-münâsaha müteveffâ-yı mezbûr Hasanˈa gelince derece-i sâlisede iki bin sekiz yüz seksen sehimden i‘tibâr olunup sihâm-ı mezkûrede altı yüz kırk yedi sehim mezbûre Ümmühaniˈye ve iki bin otuz sehmi mezbûr Hasanˈnın veresesine ve iki yüz üç sehmi merkūm Mehmedˈe isâbet eyleyip lâkin mezbûrân Râbia ve Kadriˈnin hâl-i sıgārlarında mallarından olmak üzere mezbûre Ümmühani talebiyle cânib-i şer‘den mukadder ve mefrûz nafakalarından müctemi‘ ve müstedâne mezbûre Râbiaˈnın yedi bin iki yüz akçe kezâlik müteveffâ-yı merkūm Kadriˈnin on iki bin dokuz yüz altmış akçe muhallefâtlarından mezkûre Ümmühaniˈye edâ olunmak şer‘an lâzım gelip ve müteveffâ-yı mezbûr Hasanˈın düyûn-ı kesîresi olup hisse-i (…?) mezkûreden mâ‘adâ ism-i mâl ıtlâk olunur şey’i olmamağla müteveffiyân-ı mezkûrânın muhallefâtlarından nafaka-i mezkûrenin edâya menzil-i mezbûrda olan hisse-i mezkûreden mâ‘adâ malları olmayıp husûs-ı mezbûr mahâllinde tahrîr olunmak iltimâs olunmağın savb-ı şer‘den fahrüˈl-kuzât Mevlânâ Mustafa Efendi b. Zeynelabidin irsâl olunup ol dahi zeyl-i sahîfede mastûrüˈl-esâmî olan Müslimîn ile menzil-i mezkûrda varıp akd-i meclis-i şer‘ eyledikde verese-i mezbûre talebleriyle hâssa mi‘mârlarından Ali Bey menzil-i mezbûru misâha ve tahmîn ve takvîm eyledikde zikrolunan menzil-i mezbûrdan tarîk-i hâs tarafından bir biri üstünde iki bâb tahtânî vakıf hamamı odaları ve müstakil zokak kapısı ve dehlizi ve kenîfi ve kenîf kurbünde cedîd nerdübân vaz‘ eyleyip kendüye tarîk ittihâz etmek üzere on iki bin cedîd akçeye takvîm olunup bâlâda mezkûr nafaka-i mefrûzadan on iki bin akçesine takās ve ta‘yîn ve tahsîs olunup ol dahi sagīrân-ı mezbûrânın muhallefâtlarından lâzım gelen min-haysüˈl-mecmû‘ yirmi bin yüz altmış akçe nafaka hakkını ve müteveffâ-yı mezbûr Abdurrahmanˈdan hisse-i mezkûresinden ziyâdesince tenkıs-ı mezkûr bey‘ olunup semeninden almak vasiyet üzere kabûl eyledikde minvâl-i muharrer üzere tenfîz-i mezkûr alâmet-i fâsıla nasb ve ta‘yîn olunup zikri mürûr eden menzilden Ahmed Ağa veresesi ve Arakıyeci Ramazan taraflarından bir bâb tahtânî ve bir bâb fevkānî cedîd ve atîk odaları ve bağçeleri ve bi’r-i mâ’ı bey‘ arz olunmak üzre münâdîye verilip ber-vech-i muharrer mezbûretân Ümmühani ve diğer Ümmühani her biri râzılar olduklarında vâki‘ hâli mevlânâ-yı mezbûr mahâllinde tahrîr ve ba‘dehû ma‘an ba‘s olunan İsa Beşe b. Halil ile meclis-i şer‘a gelip alâ-vukû‘ihî inhâ ve takrîr etmeğin mâ vaka‘a biˈt-taleb ketb olundu. Hurrire fî-evâhir-i şehr-i Şevvaliˈl-mükerrem sene 1084. Şuhûdüˈl-hâl: el-Hâc Mustafa Efendi el-imâm, Musa Çelebi b. İbrahim, el-Hâc Mustafa b. Mansur, Ahmed Çelebi el-mütevellî, el-Hâc Mustafa b. Ali, Mehmed b. Yakub, İsa b. Mehmed