Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 121 Hüküm no: 92 Orijinal metin no: [8a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Filikacı Panayot ve kızı Salti’nin daha önce zimmetini ibra ettikleri damadı ve kızının kocası Ziso v. Yani aleyhine açtıkları alacak davalarının meşru olmadığı Galata’da Sultan Bayezid Mahallesi’nde mütemekkin Filikacı Panayot v. Kostantin nâm zimmî kendi nefsinden asâleten ve sulbiye kebîre kızı Salti Nasrâniye tarafından husûs-ı âtîde vekîl olduğu şahsını ârifân Nikola v. Dimitri ve Tanaş v. Nikola nâm zimmîler şehâdetleriyle sâbit olmağla vekâleten Galata Bâb Mahkemesi’nde meclis-i şer‘de sâbıkı güğeyisi Ziso v. Yani zimmî muvâcehesinde benim mersûm Ziso zimmî zimmetinde cihet-i karzdan elli guruş mütâlebesine ve kızım müvekkilem mersûme Salti Nasrâniye’nin mâlından mersûm Ziso zimmînin bi-gayr-ı hak ahz u istihlâk ettiği otuz guruş kıymetli bir elmaslı altın yüzüğün kıymet-i merkūmesine müte‘allika da‘vâdan zimmî-i mersûmun zimmetini bi’l-asâle ve bi’l-vekâle bundan akdem kabûlü hâvî ibrâ ve iskāt etmişidim lâkin ibrâ-i mezkûruma nâdim ve pişmân olmamla meblağ-ı merkūmu hâlâ taleb ederim deyü tasaddî eylediği da‘vâsı takrîr-i meşrûhu üzere mukaddem tarihiyle ibrâsını mukır iken mesmû‘a ve mu‘tebere olmamağla iltifât olunmadığı bi’l-iltimâs huzûr-ı âlîlerine i‘lâm olundu. Fî-selhi Safer sene [1]221.