Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 183 Hüküm no: 214 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Mustafa’nın Ayşe bt. Abdurrahman’ın yanında kalmayı kendi iradesiyle seçen bâliğa kızı Ayşe’nin kendisine teslîm edilmesi talebiyle açtığı davada muarazadan men‘ olunduğu Sâhibe-i arzuhâl zâtı vech-i şer‘î üzere mu‘arrefe Meryem bt. Mustafa nâm hatun Galata Bâb Mahkemesi’nde meclis-i şer‘de Âişe bt. Abdurrahman b. Abdullah’ın zevci ve tarafından husûs-ı âtîde sâbitü’l-vekâle vekîli derûn-ı arzuhâlde mezkûrü’l-ism es-Seyyid Salih Ağa b. es-Seyyid Mustafa muvâcehesinde mezbûre Meryem Hatun’un sadriye kızı olup cüssesinin bülûğa tahammülü olmağla rü’yet-i dem-i hayzla bülûğunu mukırre ve mu‘terife ve zâtı mu‘arrefe Âişe bt. Hasan nâm bikr-i bâliğa hâzıra olduğu hâlde ben fakīre ve mu‘sire olup kızım mezbûreyi infâkdan âcize olduğuma binâen li-ecli’t-tebennî ve’t-terbiye kızım mezbûreyi hâl-i sıgārında müvekkile-i mezbûreye teslîm etmişidim kızım mezbûre dahi müvekkile-i mezbûreden vücûhla hoşnûd ve râziye olup bu esnâda âkıle ve bâliğa ve reşide olduğunu Galata nevâhîsinden Tophane nâhiyesi nâibi müderrisîn-i kirâm-ı zevi’l-ihtirâmdan İsmail Efendi huzûrunda ikrâr ve müvekkile-i mezbûreye nefsini şehriye altışar guruşa îcâr ve yedine kıbel-i şer‘den hüccet-i şer‘iyye i‘tâ olunduğuna âlime olduğum anda vekîl-i mezbûru nâib-i mûmâ-ileyh huzûruna ihzâr ve ber-vech-i meşrûh akd-i îcâr ve istîcârlarını fesh ve kızım mezbûrenin bana teslîme tenbîh olunmasını istid‘â eylediğim kızım mezbûre istintak olundukda kemâ-kân müvekkile-i mezbûre hizmetinde kendiyi ibkāsını ihtiyâr eylediğine binâen benim kelâmıma iltifât olunmayıp bî-vech mu‘ârazadan bâ-i‘lâm-ı şer‘î men‘ olunmuşidim el-hâletü hâzihî kızım hâzıra-i mezbûreyi taleb ederim deyü istirhâm eyledikde hâzıra-i âkıle-i mezbûre Âişe dahi istintak olundukda nefsini müvekkile-i mezbûre yanında ihtiyâr eylediğine ısrâr etmeğin mûcebince mezbûr Meyrem’e husûs-ı merkūm için müvekkile-i mezbûreye mu‘ârazadan ba‘de’l-men‘ hâzıra-i mezbûre Âişe müvekkile-i mezbûre hizmetinde kemâ-kân ibkā olunduğu İbrahim Çavuş mübâşeretiyle huzûr-ı âlîlerine i‘lâm olundu. Fî 29 R sene [1]221.