Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 845 Hüküm no: 1105 Orijinal metin no: [133a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Ebûbekir’in câriyesi Rukiye’yi âzat ettiği Mahmiye-i İstanbul’da Yahnikapanı mahallesinde sâkine Âmine bt. Ebûbekir nâm hâtunun zevci ve bir tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifûn Şaban Beşe b. Mahmud ve Derviş Çelebi b. Ahmed ve Mustafa Beşe b. Resul nâm kimesneler şehâdetleri ile şer‘an sâbit olan Ahmed Çelebi b. Mustafa nâm kimesne meclis-i şer‘-i şerîfde bi’l-vekâle ikrâr ve takrîr-i kelâm edip müvekkilem mezbûre Âmine kendiye rıkkıyyetini mu‘terife çatık kaşlı, kara gözlü Rûsiyyetü’l-asl Rukiye bt. Abdullah nâm mu‘abbere câriyesini hasbeten lillâhi’l-Hallâk malından tahrîr ve i‘tâk ve zümre-i harâir-i asliyyâta idrâc ve ilhâk eyledi min ba‘d mevsûfe-i mezbûre hürre olup velâ-i şer‘îden gayrı üzerinde müvekkilem mezbûrenin hakkı kalmadı dedikde mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Efendi b. Mehmed el-İmâm, el-Hâc Abdi b. ( ) el-Mütevellî, başkâtib Mehmed Efendi, Mustafa Beşe b. Musa, takyeci Mehmed Çelebi, Hacı Mustafa b. ( ) Beşe, Ahmed Çelebi b. Hüseyin.