Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 75 Hüküm no: 44 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilaver b. Abdullah adlı kaçak kölenin Veli Bey’e teslimi Vilâyet-i Anadolu’da Amasra kazâsına tâbi‘ Kayadibi nâm karye sükkânından işbu bâ‘isü’l-kitâb Veli Bey b. Hüseyin nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Cebeali kapısı dâhilinde sâkin iftihârü’l-emâsil ve’l-ekârim sabıkā balık emîni olan Mehmed Efendi tarafından husûs-ı âti’l-beyâna vekîl-i şer‘îsi olan Mehmed Çelebi b. Abdülkerim muvâcehesinde üzerine da‘vâ edip işbu hâzır bi’l-meclis açık kaşlı, gök gözlü, uzun boylu, Rusiyyü’l-asl Dilaver b. Abdullah nâm gulâm mülküm olup târîh-i kitâbdan üç ay mukaddem ibâk eylemişdi, hâlâ müvekkil-i mezbûr Mehmed Efendi târîh-i kitâbdan iki ay mukaddem ismi ma‘lûmum olmayıp gāib ani’l-meclis olan kimesneden yüz guruşa iştirâ ve tesellüm eyleyip müdde‘î-i mezbûrun mülkü olduğu ma‘lûmum değildir deyü inkâr ile cevâb verdikde gıbbe’l-istişhâd udûl ve sikātdan İbrahim Efendi b. Osman ve diğer İbrahim Beşe b. Veyis nâm kimesneler hâzırân olup fi’l-hakīka gulâm-ı mevsûf-ı mezbûr müdde‘î-i mezbûrun mülkü ve hakk-ı sırfı olup târîh-i kitâbdan üç ay mukaddem mülkünden ibâk eylemişidi, biz bu husûsa şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyeti şerâyiti’l-kabûl şehâdetleri hayyiz-i kabûle vusûl buldukdan sonra müdde‘î-i mezbûra gulâm-ı mezbûru âhara bey‘ ve hibe etmeyip bir tarîkle mâlından ihrâc eylemediğine yemîn teklîf olundukda hasebi’l-mesûl yemîn bi’llâhi te‘âlâ etmeğin gulâm-ı mezbûru [8a] müdde‘î-i mezbûra teslîm etmek üzere vekîl-i mezbûra tenbîh-birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: Mehmed b. İlyas, Hüseyin Beşe b. Abdullah, Kabil Beşe b. Abdullah, Mehmed b. Mustafa, Hasan Çelebi b. Kanber.