.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 350
Hüküm no: 489
Orijinal metin no: [267-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice Hâtun bt. Abdullah’ın evini vakfettiğine dâir vakfiyesi

Elhamdü li veliyyihî ve’s-salâtü alâ Nebiyyihî Muhammedin ve âlihî ve ashâbihî ecma‘în ammâ ba‘d. Havâss kazâsına tâbi‘ Hasköy mahallâtından el-Hâc Şaban mahallesinde sâkine işbu sâhibetü’l-hayrât ve’l-hasenâtın sâhibesi fahrü’l-muhadderât Hatice Hâtun bt. Abdullah meclis-i şer‘-i hatîr-i lâzımü’t-tevkīrde işbu vakf-ı âti’l-beyânı li ecli’t-tescîl mütevellî nasb eylediği Mustafa Çelebi b. Halil nâm serrâc-ı hâssa mahzarında bi’t-tav‘i’s-sâf ikrâr ve takrîr-i kelâm eyledi ki silk-i mülkümde muntazam olup mahalle-i mezbûrede vâki‘ bir tarafdan Ahmed b. İlyas mülkü ve bir tarafdan Saliha bt. Rıdvan mülkü ve bir tarafdan Sâime bt. Abdullah mülkü ve bir tarafdan tarîk-i âm ile mahdûd ve mümtâz olan iki bâb tahtânî beyti ve bir kenîfi ve bir bi’r-i mâ’ı ve eşcâr-ı müsmire ve gayr-ı müsmireyi müştemil olan mülk menzilimi cemî‘ tevâbi‘i ve levâhıkı ile hasbeten lillâhi’l-aliyyi’l-azîm ve taleben li merdâti’r-Rabbi’r-rahîm vakf-ı sahîh-i şer‘î ve habs-i sarîh kılıp şöyle şart eyledim ki hayâtda oldukça menzil-i merkūmda ben sâkin ve mutasarrıfa olup müddet-i hayâtımda vakf-ı mezbûrun tebdîl ve tağyîr ve tevliyet ve sâir tasarrufu [268] yedimde ola ba‘de vefâtihâ mütevellî-i merkūm Mustafa Çelebi ve evlâdı ve evlâd-ı evlâdı batnen ba‘de batnin neslen ba‘de neslin sâkin ve mutasarrıf olalar, ba‘de’l-inkırâz -el-iyâzü billâh min kahri’l-feyyâz- mahalle-i mezbûre mescidinde her kim imâm olursa onlar sâkin ve mutasarrıf olalar ve sâkin olanlar her gün benim rûhum için üç İhlâs-ı şerîf tilâvet edip sevâbın rûhuma hibe eyleyeler ve menzil-i mezbûru meremmet eyleyeler ve mahalle-i mezbûre bi’l-külliye harâba olursa menzil-i mezbûr Medîne-i Münevvere -şerrefehallâhü te‘âlâ- için i‘dâd olunan evkāfa mülhak vakıfdan olup mütevellî kim olursa ol kabz ede ve îcâr eyleyip hâsıl olanı ol taraf-ı pür-şerefe irsâl eyleye ve menzil-i mezbûru li ecli’t-tescîl mütevellî nasb eylediği merkūm Mustafa Çelebi’ye teslîm olup ol dahi meclis-i müşârun-ileyhde tesellüm edip ve kabzına i‘tirâf ettikden sonra vâkıfe-i mezbûre Hatice Hâtun i‘âde-i kelâm edip vakf-ı akār cümle e’imme-i kibâr ve müctehidîn-i ahyâr katlarında sahîhdir lâkin İmâm-ı A‘zam ve hümâm-ı akdem sirâcü’l-milleti ve’d-dîn Ebû Hanîfe-i Kûfî -âmelehüllâhü te‘âlâ bi-lafzı’l-celiyyi ve’l-hafî- katında lâzım olmayıp vâkıfe menâfi‘-i vakfı kendiye şart ettikde İmâm Muhammed b. Hasan eş-Şeybânî hazretleri katında bâtıl olmağın vakfından rücû‘ edip kemâkân silk-i mülküne istirdâd ederin dediğinde mütevellî-i mezbûr cevâb-ı bâ-savâba tasaddî edip fi’l-hakīka İmâm-ı müşârun-ileyh Hazretleri katında vakf-ı akār lâzım olmayıp ve vâkıfe menâfi‘-i vakfı kendiye şart ettikde İmâm Muhammed katında bâtıldır ammâ İmâm Ebî Yusuf katında vakf-ı akār sahîh olduğundan sıhhat dahi lüzûmdan müfârık olmayıp ve İmâm-ı müşârun-ileyh hazretleri katında vâkıfe menâfi‘-i vakfı kendiye şart eyledikde vakıf sahîh [ve] lâzımdır deyû redden imtinâ‘ edip hâkim-i muvakki‘-i sadr-ı kitâb -hedâhüllâhü te‘âlâ sünene’s-savâb-a murâfa‘a olduklarında hâkim-i mûmâ-ileyh -esbağa ni‘amehû aleyh- ba‘de’t-te’emmül cânib-i vakfı evlâ ve ecrâ görüp alâ kavl-i men yerâhü menzil-i mezbûrun vakfiyyetinin sıhhat-i lüzûmuna hüküm ve tescîl edip min ba‘d vakf-ı mezbûrun ibtâl ve ta‘tîli mümteni‘ü’l-ihtimâl oldu fe-men beddelehû ba‘de mâ semi‘ahû fe-innemâ ismuhû alellezîne yübeddilûnehû innallâhe semî‘un alîm ve ecrü’l-vâkıfeti ale’l-hayyi’l-kayyûm. Hurrire fî evâhiri Şevvâli’l-mükerrem li sene ihdâ ve hamsîn ve elf.


Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed es-Serrâc, Abdi Bey b. Şaban es-Serrâc, Ali Dede b. Hüseyin, Ahmed b. İlyas?, Osman [b.] Abdullah, Abdülbâkī Çelebi [b.] Ahmed el-Müezzin, Receb b. Ali, Hasan b. Uğurlu ve gayruhüm mine’l-hâzırîn