Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 387 Hüküm no: 556 Orijinal metin no: [300-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir evde kadınlı-erkekli toplanıp içki ve tütün içenlerin Hasköy subaşısı Mustafa Bey tarafından yakalandıkları Havâss-ı aliyye kazâsına tâbi‘ Hasköy subaşısı Mustafa Bey b. Abdülmennân nâm kimesne mahfil-i kazâda takrîr-i kelâm edip târih-i kitâb gecesi ba‘de’l-işâ’ zeyl-i kitâbda mastûrü’l-esâmi olan müslimîn ile zikr olunan Hasköy mahallâtından Pîrî Paşa mahallesinde İbrahim Bey nâm kimesnenin tasarrufunda olan menziline varıldıkda işbu hâzırât bi’l-meclis olan Fâtıma bt. Mustafa ve Âişe bt. Halil ve diğer Fâtıma bt. Mustafa ve gāibûn bi’l-meclis olan Abdülbâkī ve Es-Seyyid Mustafa ve Ömer ve hâzırân bi’l-meclis olan Mustafa b. Mehmed ve Ahmed b. Abdullah [301] nâm nâmahrem kimesneler bir yerde şürb-i hamr ve duhân ederlerken bulup mezbûrûn Abdülbâkī ve es-Seyyid Mustafa ve Ömer firâr edip mezbûrân Mustafa ve Ahmed ve mezbûrât Fâtıma ve Âişe ve diğer Fâtıma’yı ahz eyledim suâl olunup takrîrleri tahrîr olunmak matlûbumdur dedikde, gıbbe’s-suâl mezbûrûnun her biri cevâblarında fi’l-vâki‘ târih-i kitâb gecesi mezbûrûn Abdülbâkī ve es-Seyyid Mustafa ve Ömer nâm kimesneler bizi getirip mezbûrân Mustafa ve Ahmed dâhil-i meclis olup mezbûr İbrahim Bey’in menzilinde bir yerde şürb-i hamr ve duhân edip otururken mezbûr Mustafa Bey müslimîn ile zikr olunan menzile ba‘de’l-işâ’ geldiğinde mezbûrûn Abdülbâkī ve es-Seyyid Mustafa ve Ömer firâr edip dâhil-i meclis olan mezbûrân Mustafa ve Ahmed nâm kimesne ile bizi bir yerde ahz eylediler dediklerinde mezbûrânın takrîrleri mezbûr Mustafa Bey talebiyle hıfzan li’l-makāl ketb olundu. Tahrîren fi’l-yevmi’s-sâdis ve’l-ışrîn min Şevvâli’l-mükerrem sene 1052. Şuhûdü’l-hâl: Üstâd Pîrî b. Rıdvan, Hasan b. Pîrî, Mehmed b. Hasan, Mehmed Halîfe b. Muslih el-İmâm, Abdülaziz b. Mehmed el-İmâm, Şaban Beşe b. Mehmed, Mehmed b. İbrahim el-Müezzin, Ali b. Abdullah el-muhzır ve gayruhüm