Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 393 Hüküm no: 568 Orijinal metin no: [305-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Mustafa’nın evini kızı Fâtıma’ya hibe ettiği Havâss-ı aliyye kazâsına tâbi‘ Hasköy’de merhûm Kiremitçi Ahmed Çelebi mahallesi câmi‘-i şerîfi imâmı ve hatîbi olan Mehmed Efendi b. Mustafa meclis-i şer‘-i hatîr-i lâzımü’t-tevkīrde sulbiye kebîre kızı işbu bâ‘isetü’l-kitâb Fâtıma bt. mezbûr Mehmed Efendi tarafından zevci ve vekîli olan Ramazan Bey b. Abdullah mahzarında ikrâr ve i‘tirâf edip mahalle-i mezbûrede vâki‘ iki tarafı kendi mülküm ve bir tarafı Ali Çelebi ve Kadri Çelebi mülkleri ve tarîk-i âm ile mahdûd altı bâb tahtânî odaları ve bir su kuyusunu [ve] bahçeyi ve kenîfi müştemil olan mülk menzilimi bi-cümleti’t-tevâbi‘ kızım mezbûre Fâtıma Hâtun’a hibe-i sahîha-i şer‘iyye ile hibe ve teslîm ve temlîk ol dahi meclis-i hibede ittihâb ve tesellüm ve kabûl [ve kab]z eyledi ba‘de’l-yevm menzil-i mahdûd-ı mezkûr kızım müvekkile-i merkūmenin mülk-i mevhûbesidir ..? keyfe mâ teşâ mutasarrıfa olsun dedikde gıbbe’t-tasdîki’ş-şer‘î [mâ vaka‘a bi’t-taleb ketb] olundu. Fî gurre-i Şevvâli’l-mükerrem li sene selâse [ve hamsîn ve elf]. Şuhûdü’l-hâl: Bedri b. Ahmed, Abdülbâkī b. ..?, Mehmed Ağa (…), (…), (…) Fahrü’l-müderrisîn Ah[med] Tahiyyât-ı lâyıka ilhâkıyla inhâ olunur ki işbu sene selâsin ve hamsîn [ve elf] gurresinden size Hasköy niyâbeti tefvîz olunmuşdur, gerekdir ki varıp gurre-i mâh-ı mezbûrdan niyâbet-i merkūmeye mutasarrıf olup beyne’l-ahâlî icrâ-yı ahkâm-ı şer‘iyye edip câdde-i hakdan udûl etmeyesiz ve’s-selâm. Hurrire fi’t-târihi’l-mezbûre. El-fakīr Şeyh Mehmed el-Fenârî el-kadı bi-Havâssı Kostantıniyye el-mahrûse Hasköy Mahkemesi’ne el-fakīr ilallâhi’l-ganiyyi’l-kadîr Ahmed b. Ali’nin hilâfet tarîkiyle cülûsu medîne-i Havâss-ı Kostantıniyyetü’l-mahmiyye kadısı a‘lemü’l-ulemâ’i’l-izâm Fenârîzâde diye şöhret bulan Şeyh Mehmed Efendi zamânında vâki‘ oldu. Vaka‘a’t-tahrîr fî gurreti şehri Muharremi’l-harâm li sene selâsin ve hamsîn ve elf. Yâ Fettâh