Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 402 Hüküm no: 592 Orijinal metin no: [314-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli’nin tüfeğinin kendiliğinden ateş alıp saçması ile Hasan’ın yaralandığı Vech-i tahrîr-i hurûf oldur ki Hasköy sükkânından Ahmed nâm kimesne meclis-i şer‘a gelip takrîr-i merâm eder ki bundan akdem Bâli nâm oğlum mîrî tersâne önünde tüfenk doldurup bir hayvana atmak istediğinde tüfenk işlemeyip yere kondukda işleyip hatâ‘en Hasan nâm peremecinin sağ koluna dokunup mecrûhdur, cânib-i şer‘den üzerine varılıp keşf ve tahrîr olunsun dedikde cemm-i gafîr ile üzerine varılıp hakīkatü’l-hâl suâl olundukda, mecrûh olan Hasan beyne’l-müslimîn merkūm Bâli’nin tüfengi evvelâ işlemeyip sonra pereme içinde tutuşup saçması gelip sağ koluma dokundu şöyle ki bana bir hâl olursa kayd-ı sicil etmeğin hemşîrem vardır rencîde etmeye ki Allahü te‘âlâ bilir ki bana bu hâl kasden olmadı deyicek, mezbûr Bâli’nin atası Ahmed vâki‘ hâl kayd-ı sicil olunsun dedikde vâki‘ tahrîr olunup merkūm Bâli’nin atası beyne’l-müslimîn mecrûha altı yüz nakid akçe verip nafaka için ve her ne ederse cerrâha çekerim dediği tahrîr olundu ve mezbûr Bâli seferli olmağın Edirne’ye giderin deyû ikrârı kayd-ı sicil [olundu.] Tahrîren fî evâhiri şehri Zilka‘de ..? Şuhûdü’l-hâl: Bekir Çelebi b. es-Seyyid Ömer, Hasan Bey, İmâm, Keçeci Abdullah b. Mehmed, Mustafa Bey, Ahmed Bey, el-Hâc Behmen, Mehmed b. Abdullah, Sefer el-Muhtesib ve gayruhüm mine’l-hâzırîn A‘lemü ekârimi’l-ulemâ’i’l-izâm