Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 404 Hüküm no: 599 Orijinal metin no: [316-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin babasından intikal eden miras hissesini Hüsrev b. Abdullah’tan teslim aldığı Oldur ki Hazret-i Ebâ Eyyûb el-Ensârî -aleyhi rahmetü’l-Bârî- kazâsına tâbi‘ Hasköy’de sâkin Turşucuzâde Hüseyin Çelebi mahallesinde sâkin Ali Çelebi b. Hakīr? Memi nâm kimesne mahfil-i kazâda yine kasaba-i mezbûreden Hasan b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edip dedi ki bundan akdem mezbûr Hasan b. Abdullah benim vasîyy-i muhtârım olup müteveffâ babam Hakīr Memi’den irs-i şer‘le bana intikāl eden hisse-i mu‘ayyenem ki cem‘an altmış sekiz akçeyi merkūm Hüsrev b. Abdullah el-mütevellîden bi’t-tamâm ve’l-kemâl alıp kabz ettim, mezbûr Hüsrev b. Abdullah zimmetinde bir akçe ve bir habbe hakkım [317] kalmadı husûs-ı mezbûre müte‘allik da‘vâ ve nizâ‘ edersem inde’l-hükkâmi’l-kirâm mesmû‘ ve makbûl olmasın dedikde mukırr-ı mezbûrun vech-i meşrûh [üzre] olan ikrârını mukarrun lehü’l-mesfûr Hüsrev b. Abdullah kabûl, vicâhen tasdîk ve şifâhen tahkīk ettikden sonra bu vesîka-i enîka ber-sebîl-i temessük ketb olunup yed-i tâlibe vaz‘ olundu. Tahrîren fî evâili Zilhicceti’ş-şerîfe sene ihdâ ve ışrîn ve elf. Şuhûdü’l-hâl: Kerim Efendi el-müsta‘id, Mehmed b. Memi, Musa Bey el-Cündî, Muzaffer Bey, Mehmed b. Abdullah, Mehmed b. Haydar, Mahmud Hoca el-İmâm, Kasım b. Ali el-Müezzin, Ferhad b. Abdullah, Hasan b. Hüseyin er-Râcil, Piyâle Bey el-Cündî, Mehmed b. Mehmed, Hızır b. Ahmed