Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 69 Hüküm no: 47 Orijinal metin no: [31-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimitri ile Apostol v. Yorgi’nin akraba ve birbirinin vârisi oldukları Husûs-ı âti’z-zikrin mahallinde ketb ü tahrîri iltimâs olunmağın bu fakīr-i hâlisu’z-zamîr Havâss-ı Refî‘a kazâsı müzâfâtından kasaba-i Hasköy’de vâki‘ mumhâneye varıp zeyl-i kitâbda mastûrü’l-esâmî müslimîn huzûrunda akd-i meclis-i şer‘-i mutahhar olundukda fi’l-asl vilâyet-i Rumeli’nde Yenişehir kazâsına tâbi‘ Fener nâhiyesinde Raftoblu nâm karyeden olup hâlâ zikr olunan mumhânede mumcu olan Yani v. Dimitri v. Rizo nâm zimmî meclis-i ma‘kūd-ı mersûmda yine karye-i merkūmeden işbu bâ‘isü’s-sifr Apostol v. Yorgi v. Apostol nâm zimmî muvâcehesinde ikrâr-ı tâm ve takrîr-i kelâm edip merkūm Apostol’ün ceddi mersûm Apostol benim ceddim mersûm Rizo ile li-ebeveyn karındaşlar olup usûbet-i nesebiyye cihetinden biribirimiz ile vârisleriz deyû birbirlerine ikrâr-ı neseb eyleyip ahadühümâ âharın ikrârını tasdîk edicek mûcebiyle ahadühümâ âhara mukarrun lehû bi’n-neseb tarîkiyle verâsetlerine hükm birle mâ vaka‘a bi’t-taleb ketb olundu. Fi’l-yevmi’s-sâlis aşer min şehri Recebi’l-ferd li sene sitte ve semânîn ve elf. Şuhûdü’l-hâl: Abdülbâkī Efendi b. Ahmed, Yusuf Ağa b. Hasan, Hüseyin Ağa b. Muharrem, Mehmed Efendi b. Osman, Mehmed Bey b. Ahmed, Mehmed Bey b. Ali, İbrahim Beşe b. Abdünnebi, el-Hâc Mustafa el-Bostânî, Mehmed Bey b. Hüseyin, Ali Efendi bahçe hâcesi