Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 70 Hüküm no: 50 Orijinal metin no: [32-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hanım bt. Musa’nın yeniçerilerin 55. Odasına ait para vakfından ödünç aldığı ve karşılığında evini rehin olarak verdiği Husûs-ı âti’l-beyânın mahallinde ketb ü tahrîri iltimâs olunmağın bu fakīr zeyl-i kitâbda muharrerü’l-esâmî müslimîn ile Havâss-ı Aliyye kazâsına tâbi‘ kasaba-i Hasköy’de Pîrî Paşa mahallesi sâkinelerinden fahrü’l-muhaddarât Hatice Hanım bt. el-merhûm el-mebrûr Musa Paşa’nın menziline varıp akd-i meclis-i şer‘-i şerîf eyledikde mûmâ-ileyhâ Hatice Hanım meclis-i ma‘kūd-ı mezkûrda Dergâh-ı âlî -dâme mahfûfen bi’l-me‘âlî- yeniçerilerinin elli beşinci cemâ‘atine mahsûs oda mühimmâtına mevkûfe nukūda bi’l-fi‘l mütevellî olan işbu bâ‘isü’l-kitâb Mehmed Çelebi b. Mehmed nâm kimesne mahzarında bi tav‘ihâ ikrâr ve takrîr-i kelâm edip asl-ı mâl-ı vakf-ı mezkûrdan yedi yüz kıt‘a esedî guruş ve târih-i kitâbdan bir sene tamâmına değin üzerime ilzâm olunan ribhinden dahi yüz esedî guruş ki cem‘an mâl-ı vakf-ı mezbûrdan sekiz yüz esedî guruş zimmetimde lâzımü’l-edâ ve vâcibü’l-kazâ deynim olmağla mukābelesinde mahalle-i mezbûrede vâki‘ mezkûr Pîrî Paşa vakfı’na senede altmış akçe mukāta‘ası olup inde’l-ahâlî ve’l-cîrân ma‘lûmü’l-hudûd binâsı mülküm olan menzilimi mütevellî-i mezbûr Mehmed Çelebi’nin yedine ba‘de’t-tahliyyeti’ş-şer‘iyye rehin vaz‘ ve teslîm edip ol dahi irtihân ve kabz ve tesellüm eyledi dedikde gıbbe’t-tasdîki’ş-şer‘î mukırra-i mezbûre Hatice Hanım meclis-i mezbûrda kasaba-i mezbûrede el-Hâc Şaban mahallesi sâkinlerinden Abdülbâkī Efendi b. Ahmed mahzarında i‘âde-i kelâm edip meblağ-ı mezkûr sekiz yüz guruşu târih-i kitâbdan bir sene tamâmına değin mütevellî-i mezbûr Mehmed Çelebi’ye edâ ve teslîm edemez isem menzil-i mezkûru semen-i misli ile âhara bey‘ ve semeninden deyn-i mezbûru mütevellî-i merkūma tamâmen edâ ve teslîme ve fazla kalan meblağı bana îsâle ve kabz ve îsâl[in] mütevakkıf olduğu umûrun cümlesine küllemâ azeltüke fe-ente vekîli mazmûnu üzre azl ve in‘izâlden masûn vekâlet-i devriyye ile mezbûr Abdülbâkī Efendi’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve merâsimine edâya müte‘ahhid olmağın mâ cerâ bi’t-taleb ketb olundu. Fî gurreti Şa‘bâni’l-mu‘azzam li sene sitte ve semânîn ve elf. Şuhûdü’l-hâl: Mehmed Bey b. Ali, İbrahim Efendi b. Murad, Ahmed Çelebi b. Abdullah el-Hammâmî, Hüseyin Beşe b. Mehmed, Şaban Çelebi b. Hüseyin, Osman Bey b. Abdullah