Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 80 Hüküm no: 70 Orijinal metin no: [42-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hekim Kaşki evlâdından Hekim Mosi’ye ve çocuklarına Fâtih Sultan Mehmed tarafından verilen ve sonraki padişahlar tarafından da yenilenen muafnâme Çün ulemâ[’-i] tabâyi‘-şinâs ve etıbbâ-ı ma‘ârif-şinâsı? hakkında ri‘âyet olmak âdet-i hasene-i selâtîn-i izâmdır ..? ..? bundan akdem dârende-i fermân-ı vâcibü’l-iz‘ân Hekim Kaşki oğlu Hekim Mosi’nin kendi evlâd ve ebnâı ile karnen ba‘de karnin ve batnen ba‘de batnin başın harâcından ve bağ ve bahçe ve yer harâcından ve odundan ve ulakdan ve suhreden ve cerehordan ve sürgün ve celebden ve evine konak konmakdan ve doğancılardan ve salgundan ve hisar yapmasından ve sekbândan ve nâib ve subaşı kolluğundan ve bi’l-cümle avârız-ı dîvâniyye ve tekâlîf-i örfiyyeden ve oğlu oğluna ve kızı kızına mu‘âf ve müsellem olup bundan ve evlâdından harc ve harâc ve kāide ve kānûn istenmeyip ve avârıza karışdırmayıp dahl ve ta‘arruz eylemeyeler benim evlâd ve a‘kābımdan ve ta‘allukâtımdan bu cümleye muhânet edip tebdîl ve tağyîr eylemeyeler her kim tebdîl ve tağyîr etmek diler ve ederse -fe-aleyhi la‘netullâhi ve’l-melâ’iketi ve’n-nâsi ecma‘în- âyet-i kerîmesinin fehvâ-yı sa‘âdet-ihtivâsı tahakkuk eyleye deyû temsiyyet için ecdâd ve izâmımdan Ebü’l-feth merhûm ve mağfûrun-leh cennet-mekân ve firdevs-âşiyân Sultan Mehmed Hân -aleyhi’r-rahmetü ve’r-rıdvân- zamânından sekiz yüz elli yedinci Muharremi evâhir târihiyle müverrah berât-ı âlişân tevcîh ve inâyet edip ba‘dehû Sultan Bayezid ve Sultan Selim Hân ve Sultan Süleyman Hân ve Sultan Selim Hân ve Sultan Murad Hân ve Sultan Mehmed Hân ve Sultan Ahmed Hân -enârallâhu te‘âlâ berâhinehüm- zamânlarından dahi hükm-i hümâyûn verilip ba‘dehû Sultan Mustafa Hân ve âmm-i büzürg-vârlarım cennet-mekân ve firdevs-âşiyân Sultan Osman ve Sultan Murad Hân -tâbe serâhum- ve merhûm ve mağfûr babam Sultan İbrahim -aleyhi’r-rahmetü ve’l-gufrân- dahi ol hükm-i şerîfi mukarrer tutup ol bâbda mukarrer nâme-i hümâyûn erzânı kılınmış imiş hâlâ serîr-i saltanat-ı Osmânî ve taht-ı ferah-baht-ı sâhib-kırânî ile istîmân-ı celâlet-me’âbım müyesser oldukda mezkûr Hekim Kaşki oğlu Mosi’nin ve evlâdları atîk ve cedîd mu‘âfnâmelerin Âsitâne-i sa‘âdetime getirip tecdîd olunmasını ricâ eyledikleri ecilden ben dahi kemâkân mukarrer edip müceddeden bu nişân-ı hümâyûn-ı izzet makrûnu verdim ve buyurdum ki vech-i meşrûh üzre mezkûrların ellerinde olan mu‘âfnâmelerin mûcebince amel olunup min ba‘d âna muhâlefet ve dahl ve ta‘arruz olunmaya ve dahl etmek isteyenleri hâkimü’l-vakt olanlar men‘ ve def‘ eyleyeler memnû‘ olmayanları isim ve resimleriyle yazıp Dersa‘âdetime [43] arz eyleyeler şöyle bileler alâmet-i şerîfe i‘timâd ve i‘tikād kılalar. Tahrîren fî evâili şehri Recebi’l-mürecceb sene seb‘în ve hamsîn ve elf. Be makām-ı Kostantıniyye el-mahrûse.