Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 90 Hüküm no: 87 Orijinal metin no: [53-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Paşa’nın kızı Fâtıma Kadın’ın evini Ahmed Efendi b. Yusuf Efendi’ye sattığı Kasaba-i Hasköy’de Kiremitçi Ahmed Çelebi mahallesinde sâkin iken bundan akdem vefât eden Ali Bey b. el-merhûm İbrahim Paşa’nın li-eb kız karındaşı olup Mustafa Efendi b. Ramazan ve Mehmed Çelebi b. Siyavuş ta‘rîfleriyle mu‘arrefe olan fahrü’l-muhaddarât Fâtıma Kadın meclis-i şer‘-i şerîfde umdetü erbâbi’t-tahrîr ve’l-kalem zübdetü ashâbü’t-tastîr ve’r-rakam Ahmed Efendi b. Yusuf Efendi tarafından ikrâr-ı âti’l-beyânı tasdîke vekîli olan Ahmed Çelebi [b.] Ali mahzarında ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafı Bezirgân Evi demekle ma‘rûf menzil ve bir tarafı Ömer Bey vakfı olan menzil ve bir tarafı Abdi Bey mülkü ve bir tarafı tarîk-ı âm ile mahdûd iki fevkānî ve bir tahtânî ve bahçe ve eşcâr-ı müsmire ve [gayrı] müsmire muha[vva]tayı müştemil mülk-i mevrûs menzilimi müvekkil-i mûmâ-ileyhe dört yüz elli esedî guruşa bey‘ ve teslîm ol dahi ahz ü kabz eyleyip semeni olan meblağ-ı mezbûru yedinden bi’t-tamâm ahz ü kabz eyledim dedikde ba‘de’l-yevm menzil-i mezkûr mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîk [kayd olundu]. Fî 26 Safer sene 1089. Şuhûdü’l-hâl: Ahmed Bey b. Paşazâde, Yakub Efendi, Mehmed Çelebi b. Ahmed, Seyyid Ahmed Çelebi [b.] Mahmud, Hasan Çelebi [b.] Mahmud, Hacı Ali b. Mustafa, Hacı Mahmud Bey b. Mustafa?