Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 110 Hüküm no: 121 Orijinal metin no: [69-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Ali’nin ahırını Mehmed b. Receb’e sattığı Havâss-ı Aliyye kazâsına tâbi‘ kasaba-i Hasköy müzâfâtından Kağıthâne karyesi sükkânından Ramazan b. Ali meclis-i şer‘de bâ‘isü’l-kitâb yine karye-i mezbûre sükkânından Mehmed b. Receb mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûrede vâki‘ iki tarafdan yine kendi mülküm ve iki tarafı dahi müşterî-i merkūm Mehmed mülkü ile mahdûd ve mümtâz olan mülk ahırımı merkūm Mehmed’e otuz dört esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra ahz-ı semen ve teslîm-i mebî‘ eyledim ba‘de’l-yevm zikr olunan ahırda kat‘â alâka ve medhalim kalmayıp mezbûr Mehmed’in mülk-i müşterâsı olmuşdur keyfe mâ yeşâ’ ve hasbe mâ yahtâr mutasarrıf olsun dedikde merkūm Ramazan’ın vech-i muharrer üzre cârî ve sâdır olan ikrârını müşterî-i mezbûr Mehmed dahi vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’l-hâmis min Zilka‘deti’ş-şerîfe li sene tis‘în ve semânîn ve elf. Şuhûdü’l-hâl: Mehmed Hâce b. Ali el-Müezzin, Ahmed b. Mustafa, Mehmed b. Abdullah, Mustafa b. Abdullah, Dilâver Bey b. Abdullah, İbrahim b. Dilâver el-Muhzır, Ali b. Abdurrahman ve gayruhüm mine’l-huzzâr