Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 111 Hüküm no: 123 Orijinal metin no: [70-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in ölen Ahmed’e satmak için verdiği döşek kılıflarının bedeli için kardeşi Seyyid Mustafa ile sulh oldukları Kasaba-i Hasköy’de vâki‘ Kiremitçi Ahmed Çelebi mahallesi sâkinelerinden Fâtıma bt. Mehmed Hâce nâm hâtun tarafından sulh-i âti’z-zikre ve bedel-i sulhü kabza vekîl olup vekâleti zât-ı mezkûreyi ma‘rifet-i şer‘iyye ile ârifân olan Abdülbâkī Efendi b. Ahmed ve Hüseyin Ağa b. Muharrem şehâdetleriyle hasm-ı câhid mahzarında vekâleti sâbite olan sadrî kebîr oğlu Süleyman b. Ramazan meclis-i şer‘de işbu bâ‘isü’l-kitâb es-Seyyid Mustafa b. es-Seyyid Mahmud mahzarında bi’l-vekâle ikrâr-ı tâm ve takrîr-i kelâm edip mezbûr es-Seyyid Mustafa’nın karındaşı olup bundan akdem vefât eden Ahmed nâm müteveffâya müvekkilem mezbûre hâl-i hayâtında bey‘ edivermek için iki serâser döşek kılıfı teslîm edip mezbûr Ahmed fevt olmağla zikr olunan döşek kılıfları zimmetinde kalıp hâlâ mezbûr es-Seyyid Mustafa karındaşı müteveffâ-yı mezbûrun muhallefâtını vârisi olduğu hasebiyle kabz etmeğin tereke-i vâfiyesinden taleb eylediğinde beynlerinde nice münâza‘ât-ı kesîre vâkı‘a olup el-hâletü hâzihî muslihûn tavassut edip zikr olunan iki serâser döşek kılıfı da‘vâsından benimle sekiz yüz akçe üzerine inşâ-i akd-i sulh edip ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûru hîn-i sulhda yedinden müvekkilem ahz ü kabz edip husûs-ı mezkûra müte‘allika da‘vâdan mezbûr es-Seyyid Mustafa’nın zimmetini ibrâ-i âmm-ı kātı‘ü’n-nizâ‘la ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren el-âşir min Zilka‘deti’ş-şerîfe li sene tis‘în ve semânîn ve elf. Şuhûdü’l-hâl: Ali b. Abdurrahman, Mehmed Bey b. Ali el-Muhtesib, Dilâver Bey b. Abdullah el-Muhzır ve gayruhüm