Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 144 Hüküm no: 171 Orijinal metin no: [98-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esterola bt. İsak’ın evini oğlu Kemal v. Avraham’a sattığı Havâss-ı Aliyye kazâsı müzâfâtından kasaba-i Hasköy mahallâtında Kiremitçi Ahmed Çelebi mahallesi sâkinelerinden Esterola bt. İsak nâm Yahudiye meclis-i şer‘-i şerîf-i lâzımü’t-teşrîfde sadrî kebîr oğlu işbu râfi‘ü‘s-sifr Kemal v. Avraham Yahudi muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Mustafa Bey b. Abdullah mülkü ve bir tarafdan İshak v. Yasef nâm Yahudi ve bir tarafdan Davud b. Ali mülkü ve bir tarafdan Hana nâm zimmî mülkü ve ba‘zan tarîk-ı âm ile mahdûd üç bâb tahtânî oda ve bir hamam ve camekânı ve altında bir kârgir mahzen ve cihannümâ ve bir matbah ve dört kenîf ve dört bi’r-i mâ’ ve zât-ı eşcâr-ı müsmire ve gayrı müsmire bahçeyi müştemil mülk menzilimi bi cümleti’t-tevâbi‘ ve’l-levâhık oğlum mezbûr Kemal’e tarafeynden îcâb ve kabûlü hâvî şurût-ı müfsideden ârî üç bin kıt‘a esedî guruşa bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr üç bin kıt‘a esedî guruşu oğlum mezbûr Kemal yedinden bi’t-tamâm ve’l-kemâl ahz ü kabz eyledim min ba‘d menzil-i mahdûd-ı mezkûrda alâka ve medhalim yokdur oğlum mezbûr Kemal’in mülk-i müşterâsı ve hakk-ı sarîhi olmuşdur keyfe mâ yahtâr mutasarrıf olsun dedikde mukırra-i mezbûrenin minvâl-i muharrer üzre cârî ve sâdır olan ikrârını oğlu mezbûr Kemal vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fî 21 min Recebi’l-mürecceb li sene tis‘în ve elf min hicreti men lehü’l-izzü ve’ş-şeref. Şuhûdü’l-hâl: Umdetü erbâbi’t-tahrîr ve’r-rakam Mehmed Efendi b. Osman, fahrü’l-akrân Mahmud Çelebi b. Mehmed Çelebi eş-şehîr bi Kalenderî, Mehmed Bey b. Ali, Süleyman Çelebi b. Ramazan, Mustafa b. Bayram, Dilâver Bey b. Abdullah, Abdülbâkī Çelebi b. Ömer, Mustafa Çelebi b. Abdurrahman Efendi, ..?, Avraham v. İlya haham-ı cemâ‘at-i İşbiliye?, Kemal v. Heyt cemâ‘at-i mezbûre, diğer Avraham v. İlya haham-ı cemâ‘at-i Sinyora, ..? ..?, ..? ..?, ..? ..?