Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 158 Hüküm no: 192 Orijinal metin no: [111-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Felori bt. Haron adlı Yahudi kadının mahalleden ihrâc edilmesine dâir Havâss-ı Aliyye kazâsına tâbi‘ kasaba-i Hasköy’de bi’l-fi‘l subaşı olan işbu râfi‘ü’l-kitâb el-Hâc Mehmed b. Mehmed meclis-i şer‘-i hatîr-i lâzımü’t-tevkīrde kasaba-i mezbûre mahallâtından Kiremitçi Ahmed Çelebi mahallesi sâkinelerinden Felori bt. Haron nâm Yahudiye mahzarında üzerine da‘vâ ve takrîr-i kelâm edip mezbûre Felori kendi hâlinde olmayıp sâkin olduğu menziline nâ-mahrem kimesneler getirip ecnebîden tehâşîsi olmamağla dâimâ fesâddan hâlî değildir mezbûrenin keyfiyyet-i hâli ahâlî-i mahalle-i mezbûreden suâl olunup takrîrleri tahrîr ve mûcebi icrâ olunmak matlûbumdur dedikde ahâlî-i mahalle-i mezbûreden es-Seyyid Ahmed Çelebi b. es-Seyyid Hasan [ve] Abdülbâkī Efendi b. Ahmed ve Mehmed Ağa b. Ali [ve] Mehmed Bey b. Ali [ve] İmâm Halil Efendi b. Ömer [ve] Mustafa [ve] Mehmed Bey b. Ahmed [ve] Mehmed Çelebi b. Abdülkādir [ve] Ali Çelebi b. Abdullah [ve] Abbas b. Mustafa ve sâir ahâlî-i mahalle-i mezbûreden olup zeyl-i kitâbda muharrerü’l-esâmî olan bî-garaz kimesnelerden mezbûre Felori’nin keyfiyyet-i hâli istihbâr olundukda fi’l-hakīka mezbûre Felori kendi hâlinde olmayıp sâkin olduğu menziline nâ-mahrem kimesneler getirip ecnebîden tehâşîsi olmamağla dâimâ fesâddan hâlî değildir ef‘âl ve akvâlinden râzı ve şâkir değiliz her vechile mahalle-i mezbûreden ihrâcı lâzımdır deyû her biri alâ tarîki’ş-şehâde mezbûrenin sû-i hâlini haber vermeğin mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene tis‘în ve elf. Şuhûdü’l-hâl: Mehmed Bey b. Ali, Ali Çelebi b. Abdurrahman, Abdülbâkī b. Ömer, Dilâver Bey b. Abdullah