İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 71 Hüküm no: 23 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüsam’ın Vakfı’ndan kölesi Payidar bt. Abdullah’a hissesinin verilmesi Sebeb-i tahrîr-i kitâb budur ki Dârü’s-saltanati’l-aliyye mahmiye-i Kostantıniyye’de vâki merhûm Fîrûz Ağa mahallesinde bundan akdem vefât eden Mustafa Efendi b. Hüsam’ın utekāsından olan Payidar bt. Abdullah tarafından da‘vâ-yı âti’l-beyâna vekîl olup, mezbûreyi mu‘arrefe-i şer‘iyye ile ârifân olan Hüseyin b. Pir Ali ve Ali b. Mehmed şehâdetleri ile şer‘an vekâleti sâbit olan Mehmed b. Hüsam meclis-i şer‘-i şerîfde, müteveffâ-yı mezbûr Mustafa Efendi’nin sulbiye kızı Ayşe Hâtun’un zevci ve tarafından husûs-ı âti’l-beyâna vekîli olup, nehc-i şer‘î ve tarîk-i mu‘teber-i mer‘î üzre sâbitü’l-vekâle olan fahrü’l-kuzât Mahmud Efendi b. Sinan mahzarında bi’l-vekâle takrîr-i da‘vâ edip, müteveffâ-yı mezbûrun mülkü olup mahmiye-i merkūmede Sarıdemirci mahallesinde vâki bir tarafı İlyato nâm Yahudi mülküne ve bir tarafı Kâtib Mahmud mülküne ve bir tarafı Yahud kilisesine ve bir tarafı Hüseyin Çelebi b. Haydar mülküne müntehî olan otuz altı bâb odalarını ve kazâ-i Galata müzâfâtından kasaba-i Kasımpaşa’da ( ) mahallesinde vâki bir tarafı merhûm Şeyh Uşşâkī türbesine ve bir tarafı Behrâmzâde bahçesi ve bir tarafı Mustafa Bey b. Hüsam mülküne ve bir tarafı tarîk-i âmma müntehî olup, büyût-ı müte‘addideyi müştemil olan mülk bahçemde ve zikr olunan Fîrûz Ağa mahallesinde vâki bir tarafı Ömer Çelebi b. Abdullah mülküne ve bir tarafı Fîrûz Ağa odalarıyla ve bir tarafı keyvan Ağa b. Abdullah mülküne ve bir tarafı tarîk-i âmma müntehî olup, dâhiliyye ve hâriciyesi büyût-ı müte‘addideyi müştemil olan mülk menzilini hâl-i hayâtında ve kemâl-i sıhhatinde sitte ve ışrîn ve elf Zilka‘desi evâilinde umûr-ı evkāfı istimâ‘ ve hükme me’mûr olup, sâbıkan Anadolu Kazaskeri iken vefât eden Zeynelâbidin Efendi b. Ferruh huzûrunda vakf-ı sahîh-i şer‘î ile vakf edip, kasaba-i mezbûrede vâki zikri sebk eden bahçenin tasarrufun ve mahmiye-i merkūmede Fîrûz Ağa mahallesinde olan menzilin süknâsını kızı mezbûre Ayşe’ye ba‘dehâ mezbûre Ayşe’nin evlâdına ve evlâd-ı evlâdına ile’l-inkırâz şart edip, ba‘de’l-inkırâz menzil-i mezbûr ecr-i misliyle îcâr olunup hâsıl olan icâresiyle mahmiye-i mezbûrede olan fukarâya ve erâmil ve eytâma her re’s-i senede papuç ve kaftan alıverile. Ve zikr olunan odalar dahi ecr-i misliyle îcâr olunup hâsıl olan icâresinden yevmî birer buçuk akçe ile altmış nefer kimesne vakt-i subhda vâkıf-ı mezbûr rûhiyçün Kur’ân-ı azîm ve Furkān-ı kerîm’den birer cüz’-i şerîf tilâvet edeler. Ve yevmî otuz akçesini kızım mezbûre Ayşe mutasarrıfe olup, vefâtından sonra evlâdı ve evlâd-ı evlâdı batnen ba‘de batnin ve fer‘ân gıbbe aslın mutasarrıf olup, ba‘de’l-inkırâz meblağ-ı merkūm otuz akçe evkāf-ı mezbûre icâresine mülhak olup, vech-i merkūm üzre fukarâya sarf oluna. Ve zevce-i metrûkesi olan Ayşe bt. Mehmed dahi zikr olunan odalar icâresinden yevmî üçer akçe vazîfe ta‘yîn edip, vefâtından sonra meblağ-ı merkūm kezâlik evkāf-ı mezbûre icâresine mülhak ola. Ve zikr olunan vakf odaların zevâ’idini utekām ve evlâd-ı utekām ve evlâd-ı evlâd-ı utekām alâ tarîki’s-seviyye mutasarrıf olalar. Ve ba‘de’l-inkırâz vech-i merkūm üzre fukarâya sarf oluna deyip, tevliyyet-i hasbiyyesini evvelâ nefsine ba‘dehû utekāsının ve evlâd-ı utekāsının aslahına şart edip, ba‘dehum tevliyyet-i mezbûreyi hâkim kime dilerse tevcîh ede deyip ve şürût-ı mezkûrenin tebdîl ve tağyîri yedinde olmasını şart etmişdir. El-hâletü hâzihî zevâ’id-i vakf-ı mezbûrdan ber-mûceb-i şart-ı vâkıf müvekkilem merkūme Payidar’a âid olan hissesini vâkıf-ı mezbûrun kızı mezbûre Ayşe vermekde ta‘allül eder, suâl olunup alıverilmek taleb ederim deyip, hâkim-i mûmâ-ileyh imzâsıyla mümzât ve hâtemi ile mahtûme târih-i mezbûr ile müverraha takrîrine muvâfık vakfiyye ibrâz etmeğin, vekîl-i mezbûr Mahmud Efendi istintâk olundukda, cevâbında fi’l-vâki‘ müteveffâ-yı mezbûr hâl-i sıhhatinde târih-i merkūmda