İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 96 Hüküm no: 67 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bülûğa eren Mehmed Çelebi b. Ferhad’ın vasîsi Ali Beyden mallarını teslim aldığı Mahmiye-i İstanbul’da vâki‘ ( ) mahallesi sükkânından olup sinn ü cüssesinin bülûğa tahammülü olup ve bülûğunu i‘tirâf eden Mehmed Çelebi b. Ferhad meclis-i şer‘de râfi‘ü’l-kitâb Ali Bey b. Abdullah muvâcehesinde ikrâr ve takrîr-i kelâm edip, li ebeveyn ammim olup bundan akdem vefât eden Ömer nâm kimesnenin verâseti bana münhasıra olup cümle muhallefât-ı bana intikāl ettikde, ben sagīr olmamla merkūm Ali Bey kıbel-i şer‘den vasî nasb olunduğu ecilden, ammim müteveffâ-yı mezbûrun muhallefâtından ve babam olup ammimden evvel vefât eden merkūm Ferhad’ın deyn-i şer‘îden ammim zimmetinde hakkı olan meblağdan merkūm Ali Bey vesâyeti hasebiyle yüz on dokuz bin dört yüz akçe kabz etmiş idi. El-hâletü hâzihî ben bâliğ olup mâlımı bi nefsihî hıfza iktidârım olmağla, yüz yirmişer akçe hesâbı üzre tâmmü’l-vezn ve sahîhü’l-ayar üç yüz filori ve seksener akçe hesâbı üzre üç yüz guruş ve mâ‘adâsı akçe cem‘an yüz on dokuz bin dört yüz akçeyi mezbûr Ali Bey yedinden ahz u kabz eyledim, merkūm Ali Bey vesâyeten kabz eylediği meblağdan zimmetinde bir akçe ve bir habbe hakkım kalmadı dedikde, mâ vaka‘a gıbbe’t-tasdîki’ş-şer‘î kayd şüd. Tahrîren fî evâhiri Saferi’l-hayr li sene seb‘a ve ışrîn ve elf. Şuhûdü’l-hâl: Mehmed b. Vildan el-müezzin, Mehmed Çelebi, es-Seyyid Ali Çelebi Hamamcı, Yahya Çelebi b. ( ) el-Hâc Hasan b. ( ), Abdurrahman b. Ahmed, Abdürrahim b. Ahmed, Mehmed b. Ali, Receb b. Ali, Mustafa b. Osman, Abdurrahman b. el-yesârî, Mustafa b. Yusuf, Süleyman b. Mehmed, Ali b. Mehmed.