İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 99 Hüküm no: 72 Orijinal metin no: [7a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Gürânî Vakfı’na ait hamamının eski işletmecisi Hüdâverdi Beşe b. Abdullah’ın, halefleri Timur ve Mustafa’nın zimmetlerini ibrâ ettiği Mahmiye-i Kostantıniyye’de vâki‘ olan Molla Gürânî Hamamı’nın sâbıkan hamamcısı olan Hüdâverdi Beşe b. Abdullah meclis-i şer‘de bundan esbak zikr olunan hamamın ber vech-i iştirâk hamamcıları olan sâhib-i hâze’l-kitâb Timur Bey ve Mustafa Beşe ibney Musa nâm karındaşlar muvâcehelerinde ikrâr ve takrîr-i kelâm edip, mârrü’z-zikr hamamın hamamcısı iken meremmet ve imâret lâzım geldikde izn-i şer‘le kendi malımdan doksan yedi bin akçe masraf edip mütevellîsinin dahi ma‘rifeti olmağın ve mezbûrân Timur Bey ve Mustafa Beşe ol târihde hamamcı olmağla ma‘rûf olan meblağ-ı mezbûr merkūmlardan bana havâle olunmağın, meblağ-ı mesfûru mezbûrân Timur Bey ve Mustafa Beşe yedlerinden bi’t-tamâm ahz u kabz eyledim ve zikr olunan hamama müte‘allik olan akçeden ve esbâb da‘vâsından mezbûrların zimmetlerin ibrâ-i âm ile ibrâ ve ıskāt-ı tâm ile ıskāt etdim, ba‘de’l-yevm husûs-ı mezbûra müte‘allik benden asâleten veya vekîlimden vekâleten da‘vâ sâdır olursa lede’l-hükkâm-ı zevi’l-ihtirâm mesmû‘a olmaya dedikde, gıbbe’t-tasdîk mâ vaka‘a ketb olundu. Fi’t-târihi’l-mezbûr. Şuhûdü’l-hâl: Es-Sâbikūn.