İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 103 Hüküm no: 79 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Hüseyin’in Acemi kâtibi Davud Ağa’nın oğlu Mehmed’deki alacağını tahsil ettiği Mahmiye-i İstanbul’da Dülgerzâde mahallesinde sâkine Emine Hâtun bt. Hüseyin tarafından husûs-ı âti’z-zikri ikrâra mezbûre Emine Hâtun’u ma‘rifet-i şer‘iyye ile ârifeyn olan Cafer b. Abdullah ve Mustafa b. Ali şehâdetleri ile vekâleti sâbite olan Ali Çelebi b. Abdullah er-râcil meclis-i şer‘-i kavîm-i lâzımü’t-tekrîmde, bundan akdem acemi kâtibi olan iftihârü’l-emâcid ve’l-ekârim câmi‘ü’l-mekârim Mi‘mârzâde demekle şehîr Mehmed Efendi b. Davud Ağa kıbelinden ikrâr-ı âti’l-beyânı tasdîka Mehmed b. Mustafa er-râcil ve Mustafa b. Mehmed er-râcil şehâdetleriyle şer‘an vekâleti sâbite olan fahrü’l-cüyûş Ali Çavuş b. Pervâne muvâcehesinde ikrâr ve ta‘bîr ani’l-merâm edip, bundan esbak mûmâ-ileyh Mehmed Efendi bi tarîki’l-karz müvekkilem mersûme Emine Hâtun’dan altmış bin fıdda akçe iktirâz edip mukābelesinde mahmiye-i mezbûrede İskender Paşa mahallesinde vâki‘ bir tarafdan Hasan Ağa b. Abdullah mülküne ve bir tarafdan tarîk-i hâssa ve bir tarafdan tarîk-i âmma müntehî olup, büyût-ı müte‘addideyi hâvî olan mülk menzilini ba‘de’t-tahliyye mezbûre Emine Hâtun katında rehin vaz‘ eylemişdi. El-hâletü hâzihî müvekkile-i mezbûre meblağ-ı merkūmu bi’t-tamâm müşârun-ileyh Mehmed Efendi yedinden alıp kabz eyleyip, menzil-i mezbûru kendiye teslîm edip fekk-i rehin eyledim. Min ba‘d meblağ-ı mersûmdan mezkûr Mehmed Efendi zimmetinde bir akçe ve bir habbe hakkım kalmadı dedi deyicek, vekîl-i mezbûru ikrâr-ı meşrûhunda mersûm Ali Çavuş vekâleten tasdîk edicek, mâ hüve’l-vâki‘ ketb olundu. Tahrîr fi’l-yevmi’s-sâlis min şehri Rebî‘ilevvel li sene seb‘a ve ışrîn ve elf. Şuhûdü’l-hâl: Umdetü’l-asâkir ve’l-cüyûş Mustafa Çavuş b. Abdülmennân, Ebûbekir Çelebi b. Ali, Hasan Efendi b. el-Hâc Şaban, Murad b. Mehmed.