|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 105 Hüküm no: 84 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Ahmed’in babasının mîrâsında annesi Sâime bt. Abdurrahman’ın zimmetini ibrâ ettiği
Mahmiye-i Aksaray kurbunda Hasan Ağa mahallesinde sâkin Mehmed b. Ahmed tarafından husûs-ı âti’z-zikre hasm-ı câhid mahzarında Mustafa b. Ahmed ve Abdülfettah b. Süleyman şehâdetleriyle şer‘an vekâleti sâbite olan Mustafa Çelebi b. Mehmed meclis-i şer‘de bâ‘isetü’l-kitâb Sâime Hâtun bt. Abdurrahman tarafından ikrâr-ı âti’z-zikri tasdîka mezkûre hâtunu ma‘rifet-i şer‘iyye ile ârifân olan Mustafa b. Ahmed ve İdris b. Abdullah şehâdetleriyle şer‘an vekâleti sâbite olan Abdülfettah Efendi b. Süleyman muvâcehesinde ikrâr ve ta‘bîr ani’l-merâm edip, müvekkile-i mezbûre irs-i şer‘le merkūm Ahmed’den intikāl edip sığār-ı hâlinde vasiyy-i şer‘îsi olan Mustafa Çelebi yedinde makbûz olan cem‘an altmış yedi bin dört yüz yetmiş akçeyi vâlidesi mezbûre Sâime Hâtun ahz eylemiş idi. Hâlâ vekâletim hasebiyle meblağ-ı merkūmu taleb eyledikde ikrâr etmeğin, mezbûre Sâime Hâtun mülkü olup Havâss-ı Kostantıniyye Kazâsına tâbi‘ Ekşinöz nâm karyede vâki‘ lede’l-cîrân ma‘lûmü’l-hudûd olup Çiftlik demekle ma‘rûf olan menzili ve beynimizde ma‘lûm olan davar ve sâir âlât-ı harâseti, meblağ-ı merkūmun doksan üç bin akçesi mukābelesinde vekâleten kabûl ve kabz edip ve mezbûre Sâime yedinden ber vech-i nakd bir def‘a otuz bin beş yüz akçe ve bir def‘a dahi yirmi bin akçe alıp ve yirmi dört bin akçesi mukābelesinde bir re’s at ve Rûsiyyü’l-asl Cafer nâm gulâm ve beynimizde ma‘lûm esâs-ı beyt alıp kabz eyledim. Min ba‘d meblağ-ı merkūm altmış yedi bin dört yüz yetmiş akçeden mezbûre Sâime yedinde bir akçe ve bir habbe bâkī kalmadı dedikde, vekîl-i mezbûr Mustafa Çelebi’nin vech-i meşrûh üzre cârî olan ikrârı merkūm Abdülfettah Efendi vekâleten bi’l-muvâcehe tasdîk edicek, mâ vaka‘a ketb olundu. Hurrire fi’l-yevmi’s-sâlis min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Mehmed b. Ali el-imâm, Abdurrahman b. Veli, Mustafa b. Ahmed el-müezzin, Mehmed b. Şaban el-attâr, Mustafa b. İvaz el-kettânî, Mehmed b. Ali, Hasan Beşe el-acemî, İdris b. Abdullah et-tâcir, el-Hâc Osman b. Abdullah.
|