.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 117
Hüküm no: 105
Orijinal metin no: [10b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sinan Beşe b. Resûl’ün Yani v. Kosta’daki alacağını tahsil ettiği

Dergâh-ı âlî yeniçerilerinden Sinan Bâşe b. Resûl nâm râcil meclis-i şer‘-i kavîmde Yani v. Kosta nâm zimmî muvâcehesinde üzerine da‘vâ edip, mezbûr zimmî zimmetinde karz-ı şer‘îden yedi yüz akçe hakkım olup, bundan akdem sefer-i hümâyûna giderken meblağ-ı mezbûru merkūm dahi yedinden ahz u kabz ve îsâle babam mersûm Resûl’ü vekîl edip gitmiş idim. Hâlâ dahi meblağ-ı merkūmu edâ etmemiş suâl olunup mûcibi icrâ olunmak murâd ederim dedikde, gıbbe’s-suâl mezbûr dahi ikrâr u i‘tirâf edip, fi’l-vâki‘ vech-i muharrer üzre mezbûr Sinan Bâşe’ye karzdan yedi yüz akçe deynim olup sefer-i hümâyûna gittiği zamânda meblağ-ı mezbûru benden ahz u kabza babası mezbûr Resûl’ü vekîl etmişdi. Lâkin merkūm Resûl’e i‘timâdım olmamağla işbu hâzır bi’l-meclis olup merkūm Sinan’ın hâltesi olan Nesli Hâtun’a edâ ve teslîm etdim deyicek, mezbûr hâtun istintâk olundukda ikrâr edip, fi’l-vâki‘ meblağ-ı mezbûr yedi yüz akçe bi’t-tamâm mezbûr dahi yedinden ahz u kabz edip ba‘dehû merkūm Sinan Beşe’ye teslîm etdim deyicek, mâ hüve’l-vâki‘ gıbbe’t-taleb ketb olundu. Tahrîren fî evâhiri şehri Rebî‘ilevvel li sene seb‘a ve ışrîn ve elf.


Şuhûdü’l-hâl: Hacı İsa b. Ahmed, Hacı Mehmed b. Himmet, Mustafa b. Yahya, Musli b. Abdullah.