İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 165 Hüküm no: 189 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Modaniç ve Delvine cizyesini mukâtaaya alan Şaban Bey’in Bayezid câmii Hatîbi Abdülkerim Efendi’deki alacağı hususunda anlaştığı Kasaba-i Yenişehir sâkinlerinden Şaban Bey b. Ali el-Cündî meclis-i şer‘-i şerîfde mahmiye-i İstanbul’da vâki‘ merhûm ve mağfûrun leh Sultan Bâyezid Hân -tâbe serâhu- câmi‘-i şerîfinde hatîb olan Abdülkerim Efendi b. Hasan muvâcehesinde ikrâr ve ta‘bîr ani’l-merâm edip, bundan akdem mûmâ-ileyh Abdülkerim Efendi’den bi tarîki’l-karz ahz ettiğim dört yüz elli sekiz bin altı yüz on iki akçeden ba‘de küllî hesâb zimmetimde bâkī, cem‘an otuz sekiz bin altı yüz on iki akçe kalmış idi. El-hâletü hâzihî mûmâ-ileyh Abdülkerim Efendi’ye verdiğim yüz yirmi dört bin akçelik hazîne tezkiresinden meblağ-ı merkūm haklaşılıp ve Dividdâr İbrahim Efendi’ye emrim ile teslîm eylediği yirmi dört bin akçe hesâblaşılup mâ‘adâsı olan altmış bir bin üç yüz seksen sekiz akçesi bi’t-tamâm mûmâ-ileyh Abdülkerim Efendi yedinden alıp kabz eyleyip ve her birimiz âharın zimmetini târih-i kitâba gelince vâki‘ olan mu‘âmelâta müte‘allik cemî‘ de‘âvî ve mütâlebâtdan ibrâ-i âm ile ibrâ ve ıskāt-ı hak eyledik dedikde, mukırr-ı mezbûrun vech-i meşrûh üzre cârî olan ikrârını el-mukarru lehü’l-mezkûr vicâhen tasdîk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Fahrü’l-hutabâ Hasan Efendi el-hatîb bi Ayasofya, Umdetü’l-hutabâ İbrahim Efendi el-hatîb bi câmi‘-i Sultan Süleyman, Ahmed Çelebi kâtib-i Evkāf-ı Sultan Bayezid, Mustafa Çelebi noktacı, Fahrü’l-a‘yân Murad Ağa kethüdâ-yı sâhib-i sa‘âdet, Mefhar-i erbâbi’l-ilm Hüseyin Efendi mevkūfâtî, Umdetü’l-akrân Mehmed Ağa tâcir-i hâssa ve gayruhüm.