İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 166 Hüküm no: 191 Orijinal metin no: [20a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dömeke piskoposu Pasav’ın gasp edilen parasının Kralitse karyesi ahâlîsinde olduğu Vilâyet-i Rumeli’nde vâki‘ Çata[l]ca nâm kasaba müzâfâtından Dömeke nâm karyede piskopos olan Pasav v. Papayani nâm keşiş meclis-i şer‘de Yenişehir kazâsına tâbi‘ Kıralitse nâm karye ahâlîsinden Dimo v. Papa Kosta nâm zimmî muvâcehesinde takrîr-i da‘vâ edip, ben zikri sebk eden karye-i Dömeke’den mahmiye-i İstanbul’a gelirken karye-i mezbûra Kıralitse’ye karîb geldiğimde, merkūm Dimo karyesi ahâlîsi ile âlet-i harble üzerime gelip yüz yetmiş bin nakd-i râyic fi’l-vakt akçemi aldıkdan mâ‘adâ cümle esbâbım gāret etmişler idi. Ba‘dehû meblağ-ı merkūmun elli üç bin akçesini mârrü’z-zikr olan Kıratse ahâlîsi yedinden ahz u kabz etdim, meblağ-ı bâkīyi dahi merkūmdan taleb ederim dedikde, gıbbe’s-suâl merkūm Dimo cevâbında, müdde‘î-i mezbûr Pasav’ın esbâbını karyemiz ahâlîsi gāret ettiklerinde ben bile değil idim, lâkin merkūmun gāret olunan malından altmış altı bin akçesi hâlâ karye-i mezbûra Kıratse ahâlîsi yedinde mazbûttur, ben zikr olunan altmış altı bin akçeyi alıp merkūm Pasav’a teslîm edeyin dedikde, vâki‘ hâl gıbbe’t-taleb ketb olundu. Hurrire fi’l-yevmi’s-sâbi‘ min şehri Rebî‘ilâhir sene seb‘a ve ışrîn ve elf. Şuhûdü’l-hâl: Hasan Bey b. Abdullah, Mehmed Bey b. Abdullah, Malkoç b. Abdullah er-râcil, Süleyman b. Sefer el-cündî, İbrahim b. Receb ve gayruhüm Çukadâr Mustafa Beşe havâle.