İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 168 Hüküm no: 194 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Celep Dimo v. Yani’nin kasap Mehmed’e verdiği koyunlardan kalan alacağını eşi Ayşe’den tahsil ettiği Celeb tâ’ifesinden hâmilü’l-kitâb Dimo v. Yani nâm zimmî meclis-i şer‘-i şerîfde kasab tâ’ifesinden Mehmed b. Abdullah mahzarında ikrâr-ı tâm ve takrîr-i kelâm edip, bundan esbak mezbûr Mehmed zimmetinde re’si beynimizde ma‘lûm koyun bahâsından on sekiz bin beş yüz akçe hakkım olup, meblağ-ı merkūmdan yedi bin akçesin yedinden alıp kabz edip, bin yedi yüz akçesin dahi işbu hâzır fi’l-meclis olan fahrü’l-cüyûş Mehmed Çavuş b. İsmail’e üçümüz meclis-i vâhidde iken havâle edip, ol dahi havâle-i merkūmeyi kabûl eyleyip zimmetinden dokuz bin sekiz bin yüz akçem kalıp, meblağ-ı merkūmu târih-i kitâbdan doksan gün tamamına değin te’cîl eyledim dedikde, mezbûr Dimo’yu ikrâr-ı meşrûhunda mezbûr Kasab Mehmed ve mezkûr Mehmed Çavuş vicâhen ve şifâhen tasdîk ve tahkīk eylediklerinden sonra mahmiye-i Kostantıniyye’de Çakır Ağa mahallesi sâkinelerinden olup medyûn-ı mezbûr Mehmed’in zevcesi olan Ayşe bt. Yusuf hâzıra olup, meblağ-ı müeccel-i merkūma emr ve kabûlü hâviye kefâlet ile kefîl oldukdan sonra yine mahalle-i merkūmede sâkine mezbûre Ayşe’nin dâmâdı olan Halil Beşe b. İbrahim nâm kasab dahi hâzır olup, mezbûre Ayşe’nin nefsine ve hîn-i mütâlebede meclis-i şer‘a ihzârına kefîl oldukda, mâ hüve’l-vâki‘ mezbûr Dimo talebiyle ketb u tahrîr ve yedine def‘ olundu, ki lede’l-hâce müzekkeri mâ cerâ ola. Tahrîren fi’l-yevmi’s-sâmin min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Himmet b. Dursun, Murad b. Mehmed, Kadri b. Mustafa, Musa b. Mehmed, Mustafa.