İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 172 Hüküm no: 198 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Paşa Vakfına ait olup Anastas v. Yani tarafından yeniden yaptırılan bozacı dükkânı ile ilgili hesapların görüldüğü Zimmî tâ’ifesinden Anastas v. Yani meclis-i şer‘-i şerîfde Mehmed Beşe b. Ali nâm râcil mahzarında takrîr-i kelâm edip, merhûm Murad Paşa-yı atîk Evkāfı’ndan mahmiye-i İstanbul’da Aksaray sûkunda vâki‘ inde’l-ahâlî ve’l-cîrân ma‘lûmü’l-hudûd olan bozahâne dükkânı bundan akdem benim taht-ı icâremde iken, izn-i mütevellî ve ma‘rifet-i hâkim-i şer‘î ile dokuz bin altmış akçelik binâ ihdâs etmiş idim. Dükkân-ı mezbûru vakf-ı mezkûr mütevellîsi olan Hâfız Mustafa Çelebi Ağa nâm kimesneye îcâr ettikde, mülküm olan binânın üç bin akçesin mezbûr Mustafa Ağa’dan ahz ettikde mezbûr Mustafa dahi dükkân-ı mezbûru izn-i mütevellî ile mersûm Mehmed Beşe’ye tefvîz etmiş idim. Bâkī kalan altı bin altmış akçemi hâlâ mezbûr Mehmed Beşe yedinden bi’t-tamâm ahz u kabz etdim, bir akçem bâkī kalmadı dedikde, mukırr-ı mezbûrun ikrâr-ı meşrûhunda el-mukarru lehü’l-mezbûr bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâmis min [şehri] Rebî‘ilâhir sene seb‘a ve ışrîn ve elf. Şuhûdü’l-hâl: Ali Beşe b. Şaban, Sofili İmâmı Mehmed Efendi, Kadri b. Mustafa ve gayruhüm.