İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 183 Hüküm no: 220 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cinane bt. Abdullah’ın, küçük çocuklarına vasî tayin edilen Mehmed Çelebi’den alacağının tahsil edildiği Mahmiye-i İstanbul’da Toptaşı mahallesi sâkinelerinden Cinane bt. Abdullah nâm hâtun tarafından husûs-ı âti’l-beyânı ikrâra vekîl olup, mezbûre Cinane’yi ma‘rifet-i şer‘iyye ile ârifeyn olan İbrahim Dede b. Yusuf ve Bayezid b. Mehmed nâm kimesneler şehâdetleri ile şer‘an vekâleti sâbite olan Mehmed b. Muharrem meclis-i şer‘de, işbu hâfızu’l-kitâb Mehmed Çelebi b. Ahmed muvâcehesinde ikrâr ve ta‘bîr ani’l-merâm edip, müvekkilem mezbûre Cinane’nin sadrî sagīr oğulları Yakub ve İsmail ve İshak nâm sagīrlerin li eb karındaşı merkūm Mehmed Çelebi kıbel-i şer‘den mansûb vasîleri olup, sığār-ı mezbûrûna babaları müteveffâ-yı merkūm Ahmed’den intikāl eden hisse-i şer‘iyyelerini vesâyeti hasebiyle ahz u kabz eylemiş iken mezbûr Yakub vefât edip, verâseti vâlidesi mezbûre Cinane’ye ve li ümm kız karındaşı Ayşe’ye ve li eb ve ümm er karındaşları mezbûrân İsmail ve İshak nâm sagīrlere münhasıra oldukdan sonra, merhûm Yakub’dan müvekkilem mezbûre Cinane’ye kassâm defteri mûcebince intikāl eden bin üç yüz otuz üç akçe südüs hisse-i şer‘iyyesin ve vasîsi olduğu merkūme Ayşe’nin kezâlik südüs hissesi olan bin üç yüz otuz üç akçeyi vasiyy-i mezbûr Mehmed Çelebi yedinden elime ahz eyledikden sonra mezbûr İsmail dahi vefât edip, verâseti vâlidesi mersûme Cinane’ye ve li ümm kız karındaşı merkūme Ayşe’ye ve er karındaşı İbrahim ve li eb ve li ümm er karındaşı İshak’a münhasıra olmağın, müteveffâ-yı mezbûr İsmail’den dahi müvekkilem mezbûre Cinane’ye defter-i kassâm hesâbı üzre intikāl eden bin yedi yüz yetmiş yedi akçe südüs hissesi olup, cem‘an müvekkilem müteveffât-ı mezbûr Yakub ve İsmail’den intikāl eden hisse-i şer‘iyyesi üç bin yüz on akçe olup mezbûre Ayşe’ye dahi müteveffiyân-ı merkūm Yakub ve İsmail’den dahi kezâlik üç bin yüz on akçeyi ve merkūm İbrahim li ümm er karındaşı olan merkūm İsmail’den intikāl eden bin yedi yüz yetmiş yedi akçeyi ve mahmiye-i Üsküdar’da vâki‘ çiftlik bahâsından müvekkilem mezbûre Cinane’ye ve Ayşe’ye ve İbrahim’e üçüne ale’s-seviyye intikāl eden bin yüz akçeyi dahi cem‘an dokuz bin yüz akçeyi asâleten ve vesâyeten vasiyy-i merkūm Mehmed Çelebi yedinden bi’t-tamâm alıp kabz eyledim. Benim ve sagīrân-ı mezbûrân Ayşe ve İbrahim’in merkūm Mehmed Çelebi zimmetinde bir akçe ve bir habbe hakkımız bâkī kalmadı dedi dedikde, mukırr-ı mezbûrun bi’l-vekâle ikrâr-ı meşrûhını mezbûr Mehmed Çelebi bi’l-muvâcehe tasdîk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min şehri Rebî‘ilâhir sene seb‘a ve ışrîn ve elf. Şuhûdü’l-hâl: Mehmed Efendi b. Yusuf el-imâm, Süleyman b. Davud el-müezzin, İbrahim b. Mehmed el-imâm, Mehmed Bey, Ferhad b. Abdullah, İskender b. Abdullah.