İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 185 Hüküm no: 222 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kürkçübaşı Şemseddin Bey Vakfı mütevellisinin, yanan dükkânı yeniden inşâ eden eski kiracı Yorgi’ye verdiği Mahmiye-i İstanbul’da vâki‘ merhûm Kürkçübaşı Şemseddin Bey vakfına bi’l-fi‘il mütevellî olan Mustafa Bey b. Mehmed mahfil-i kazâda Yorgi v. Nikola nâm zimmî muvâcehesinde takrîr-i kelâm edip, vakf-ı mezbûrdan olup mahmiye-i merkūmede Bitpazarı’nda vâki‘ ayda on akçe icâre-i müeccele ile mezbûr Yorgi’nin tasarrufunda olan nısf çakşırcı dükkânı, işbu sene vâki‘ olan harîkde bi’l-külliye yanıp arsa-i sırf kalıp, zimmî-i merkūmun vakıfda ancak beş yüz akçesi kalıp ve hâlâ ben mâl-ı vakıf ile dükkân-ı mezbûru binâ edip ziyâde icâre-i müecceleye tahammülü olup, min ba‘d icâre-i müeccelesinin nısfı vakıfa ve nısfı zimmî-i merkūma olmak üzre zikr olunan nısf dükkânın tasarrufunu zimmî-i merkūma tefvîz eyledim dedikde, ol dahi vech-i meşrûh üzre min ba‘d icâre-i müeccelesinin nısfı vakıfın ve nısfı zimmî-i merkūmun olmak üzre kabûl edip, ba‘de’l-musâdaka işbu vesîka li ecli’t-temkîn ketb olundu, mütevellî-i mezbûre def‘ olundu. Tahrîren fi’l-yevmi’l-hâmis aşer min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Hüseyin Çelebi b. Abdülazîz, Mustafa Efendi el-imâm, Mustafa b. Hasan, Yusuf b. Abdullah, Hamza ed-dâ‘î el-muhzır ve gayruhüm.