İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 191 Hüküm no: 234 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkallar nâzırlığının kaldırılması Mahmiye-i İstanbul’da bakkallar hırfeti ahâlîsinden pazarbaşıları Yusuf b. Ali ve yiğitbaşıları Mustafa b. Abdullah ve bölükbaşılarından İbrahim b. Mehmed ve Ali b. Mustafa ve es-Seyyid b. es-Seyyid Abdullah ve el-Hâc Ramazan b. İslâm ve Emrullah Çelebi b. Ali ve el-Hâc İbrahim b. Hayrullah ve el-Hâc Envâr b. Abdullah ve el-Hâc Derviş b. Şaban ve Ahmed b. Pirgayib ve Kara Hasan b. Ali ve Fethullah b. Veli ve Hasan b. İlyas ve el-Hâc Behrâm b. Abdullah ve Mehmed b. Abdi ve sâirleri cem‘an meclis-i şer‘-i şerîfe gelip bast-ı kelâm edip, kadîmden mahmiye-i mezbûre bakkallarına nâzır olıgelmiş değil iken, Receb Çelebi nâm kimesne hırfet-i mezbûre ahâlîsine bir tarîkle nâzır olmağın, bakkallar beyninde ihtilâf vâki‘ olup, iki fırka olmağın, küllî ihtilâle bâ‘is ve zararı olmağın ref‘ olunmak taleb ederiz dediklerinde, fî nefsi’l-emr kadîmden hırfet-i mezbûre ahâlîsine nâzır olıgelmiş değil iken mezbûr Receb Çelebi hâlâ nâzır olmağın, vech-i meşrûh üzre ihtilâle sebeb olup fesâda mü’eddî olmuşdur deyû ehl-i vukūf ve bî-garaz Müslümanlar ihbâr eylemeğin, olıgelene muhâlif hırfet-i mezbûre ahâlîsine müte‘allik olan husûsa müdâhaleden mezkûr Receb Çelebi men‘ olunup, mâ hüve’l-vâki‘ gıbbe’t-taleb ketb ve imlâ olundu. Tahrîren fî evâsıtı şehri Rebî‘ilâhir min şuhûri sene seb‘a ve ışrîn ve elf. Şuhûdü’l-hâl: El-Hâc Mehmed b. Süleyman, Veli Halife b. Hasan, Himmet b. İbrahim, Yusuf b. Hasan, Receb b. Mahmud.