İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 201 Hüküm no: 250 Orijinal metin no: [27a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raciye Hâtun bt. Abdullah’ın para ve eşyalarını Receb b. Abdullah ile ortağının çalması Mahmiye-i İstanbul’da Enserci Şecâaddin mahallesi sâkinelerinden râfi‘atü’l-kitâb Raciye Hâtun bt. Abdullah mahfil-i kazâda, Receb b. Abdullah nâm kimesne mahzarında üzerine da‘vâ edip, işbu târih-i kitâb günü mahalle-i merkūmede vâki‘ evimi kilitleyip, ba‘zı mesâliha gidip geldiğimde, kapının kilidi kırılıp, evimin içerisinde sandığım içinde mahfûz olan bin yüz akçem zikri âtî olan esbâbım sirkat olunmuş bulup, eşyâ-i merkūmeyi tecessüs üzre iken, mezbûr Receb Beşe sarı sakallı refîki ile sirkat olunan emlâkların, işbu meclisde mevcûd olan münakkaş iki boğça ve iki hamam makraması ve iki vakıyye keten [vr. 27b] ve bir siyah hamam makraması ve bir keten bezi gömleği ve dört don ve iki münakkaş yastık yüzü ve bir yelek ve beş beyaz çarşeb ve bir beyaz kuşak ve iki makrama ve iki çenber ve bir alaca peşkir ve yirmi zirâ‘ keten bezi ve bir küçük güğümü birer peştamala koyup, mezbûrlar Balatkapı iskelesinden peremeye girip Kasımpaşa[‘ya] geçerler iken, Ayakapısı’nı hıfz eden yasakçılara haber verdiklerinde, zikr olunan yasakçılar mezbûrları peremeden çıkarıp, esbâbları ile meclis-i şer‘a getirir iken refîki firâr edip, eşyâ-i mezkûre ile mezbûr Receb’i ihzâr eyledim, suâl olunsun dedikde, gıbbe’s-suâl mezbûr Receb [cevâbında], eşyâ-i merkūme firâr eden şahsın yedinde idi ve şahs-ı mezbûr refîkim değildir deyû inkâr edip, gıbbe’l-istihbâr [istişhâd] udûl-i Müslimînden Mehmed Bey b. Abdullah el-cündî ve Hasan Bey b. Abdullah el-cündî ve Abdülgaffar Efendi b. Abdüllatif el-imâm ve Ömer b. Hasan nâm kimesneler hâzırûn olup, mezbûr Receb firâr eden şahsın refîki olup, peremeye ellerinde birer peştemal esbâbla ma‘an girdiler ve yine ellerinde birer peştemal esbâbla ma‘an çıkdılar ve peştemalımda olan esbâblar kendi mülkümüzdür deyû tezvîre sülûk etmeleriyle mezbûr Receb’in refîki firâr etti deyû, alâ tarîki’ş-şehâde haber verdiklerinden sonra, yine udûlden mezbûr Abdülgaffar Efendi ve Mehmed Bey b. Abdülcebbâr ve Sinan Bey b. Abdullah ve Süleyman b. Musa nâm kimesneler dahi mahfil-i kazâya hâzırûn olup, fi’l-hakīka işbu meclisde mevcûd olan eşyâ-i merkūmenin cümlesi müdde‘iyye-i mersûme Raciye’nin mülküdür, biz bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, gıbbe’t-ta‘dîl ve’t-tezkiye şuhûd-ı mezbûrûnun şehâdetleri makbûle olup, mûcebi ile hükm olunup, mâ vaka‘a ketb ü tahrîr olundu. Tahrîren fi’l-yevmi’s-sâbi‘ ve’l-ışrîn min şehri Rebî‘ilâhir li sene 1027. Şuhûdü’l-hâl: Mustafa b. Hasan, Safer b. Veli, Abdülcelîl b. Çalabverdi, Hızır b. Halil, Mehmed Çelebi b. Ahmed, Mustafa b. Cafer, Ali b. Abdullah, Hızır b. Abdullah ve gayruhüm.