İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 205 Hüküm no: 257 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çavuş’un Gelibolu’nun Hora ve Ganos köylerinden tahsil ettiği verginin halka iade edilmesi Gelibolu kazâsına tâbi‘ Hora ve Ganos nâm karye ahâlîsinden Kalo İstefanos v. Temyano ve Papadim Hıristaki Limyaki ve Simo v. Malta ve Karmete v. Papas ve Duka Ekmekci nâm zimmîler meclis-i şer‘-i şerîfde, fahrü’l-cüyûş Mahmud Çavuş b. Hüseyin mahzarında kendileri asâleten ve karyeteyn-i merkūmeteyn sükkânından olup ma‘lûmetü’l-esâmi olan kefere taraflarından her biri vekîl olup, bimâ hüve nehcü’s-sübût şer‘an vekâletleri sâbite oldukdan sonra, vekâleten ikrâr-ı tâm ve takrîr-i kelâm edip, zikr olunan karyeler kapudân paşa hâslarından olmakla, işbu târih-i kitâb senesinde vezîr-i mükerrem müşîr-i mufahham sâhibü’l-izz ve’l-ikbâl sâhib-i ezyâli’l-mecd ve’l-iclâl Davud Paşa hazretleri kapudân oldu deyû, zikr-i sâbık karyelerin ispençe ve sâir rüsûm-ı örfiyyelerin kadîmden zabt olunageldiği üzre mîr-i müşârun-ileyh tarafından emr-i şerîfle gelip, bizden ve müvekkillerimizden cem‘an kırk altı bin iki yüz akçemiz kabz edip, ba‘dehû kapudânlık düstûr-ı mu‘azzam ve mükerrem vezîr-i mümecced câmi‘-i mehâsin-şiyem ma‘deni’l-lutf ve’l-kerem hazreti Halil Paşa -yesserallâhu mâ yürîke ve yeşâ-’ya mukarrer olunmakla, biz gelip mezbûr Mahmud Çavuş’dan meblağ-ı merkūmu taleb eylediğimizde, meblağ-ı merkūm kırk altı bin iki yüz akçeyi bize bi’t-tamâm edâ ve teslîm edip, biz dahi bi tamâmihî kabz edip, husûs-ı mezbûra müte‘allik de‘âvîden asâlet ve vekâletimiz hasebiyle zimmetin ibrâ-i âm ile ibrâ ve ıskāt-ı tâm ile ıskāt ettik dediklerinde, mezbûrların asâlet ve vekâletleri hasebiyle südûr ve zuhûr eden ikrârların mûmâ-ileyh Mahmud Çavuş dahi vicâhen ve şifâhen tasdîk ve tahkīk etmeğin, mâ vaka‘a ketb olundu. Tahrîren fi’l-yevmi’t-tâsi‘ ve’l-ışrîn min şehri Rebî‘ilâhir min şuhûri li sene seb‘a ve ışrîn ve elf. Şuhûdü’l-hâl: El-Hâc Mehmed b. İsmail, Süleyman Beşe er-râcil, Osman b. Yusuf, Kara Mehmed b. Mustafa, el-Hâc Ali b. Abdullah.