İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 217 Hüküm no: 277 Orijinal metin no: [30b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şehabeddin Vakfı mütevellisi Hasan Çelebi b. Ahmed’in tamir ettirdiği mektebin keşfi Mahmiye-i İstanbul’da vâki‘ merhûm Şehabeddin vakfına bi’l-fi‘il mütevellî olan hâmilü’l-kitâb Hasan Çelebi b. Ahmed mahfil-i kazâda takrîr-i kelâm edip, bundan akdem vakf-ı mezbûrdan mahalle-i mezbûrede Balaban Ağa mahallesinde vâki‘ ma‘lûmü’l-hudûd yedi oda ve kapı üzerine tûlen dokuz ve kadden iki bi hesâb-ı şatrancî on sekiz zirâ‘ dolma duvar ve yine mahalle-i mezbûrede vâki‘ ma‘lûmü’l-hudûd yirmi bir oda ve kenîf ve kaldırım ve ma‘lûmü’l-hudûd mekteb muhtâc-ı meremmât oldukda, kıbel-i şer‘den nâ’ib ve mi‘mârânla üzerine varılıp meremmâta ihtiyâcı müşâhede ve mahsûs oldukdan sonra, mâl-ı vakf-ı mezbûr ile ta‘mîr ve meremmete cânib-i şer‘den izn ve ber vech-i muharrer [hüccet-i] şer‘iyye verildikden sonra, mâl-ı vakf-ı mezbûr ile ta‘mîr ve meremmet etmişdir. El-hâletü hâzihî savb-ı şer‘den üzerlerine varılıp, sarf eylediğim meblağın meremmete tahammülü tahmîn olunması taleb ederim dedikde, savb-ı şer‘den fahrü’l-me‘â[lî] Mevlânâ İsmail Efendi ve hâssa mi‘mârlardan Üstâd Ali b. Abdullah irsâl olunup zeyl-i kitâbda mastûrü’l-esâmi olan Müslümanlar ile üzerlerine vardıklarında, mi‘mâr-ı mezbûr zikr olunan yedi odanın her birini üçer yüz akçeden iki bin yüz akçe ve kapı üzerinde olan duvara beş yüz kırk akçe cem‘an iki bin altı yüz kırk akçe ve zikr olunun yirmi bir oda ve kenîf ve kaldırım ve mektebin dahi meremmetine üç bin yüz on altı akçe, cem‘an beş bin yedi yüz elli akçeye mütehammildir deyû haber verip, müstemi‘în olan Müslümanlar dahi savâb görmeğin, mevlânâ-yı mezbûr ba‘de’t-tahrîr fî mahalli meclis-i şer‘a gelip, haber verdi. Mâ hüve’l-vâki‘ ketb olundu. Tahrîren fî evâhiri şehri Rebî‘ilâhir li sene seb‘a ve ışrîn ve elf. Şuhûdü’l-hâl: Ali Efendi b. Süleyman, Ramazan [b.] Hızır, Mahmud Çelebi, Ahmed Çelebi b. Abdullah, Ramazan b. Mehmed.